ఆపదలో ఉన్నవారికి చికిత్స అందించి వారికి అండగా నిలవాల్సిన వైద్యులే ఒక్కోసారి అమానవీయంగా ప్రవర్తిస్తున్నారు. ఏ పరిస్థితుల్లో ఉన్నారో చూడకుండా వైద్యం చేసేందుకు నిరాకరిస్తున్నారు. పురిటి నొప్పులతో వచ్చిన ఓ గర్భిణీకి.. హెచ్ఐవీ పాజిటివ్ అనే నెపంతో డెలివరీ చేసేందుకు నిరాకరించిందో స్టాఫ్ నర్సు. ఈ సంఘటన ఒడిశా, మల్కాన్గిరి జిల్లాలోని కుడుములుగుమ్మ కమ్యూనిటీ హెల్త్ సెంటర్లో జరిగింది.
ఇదీ జరిగింది..
జిల్లాలోని పర్కాంమాలా ట్రైబల్ ప్రాంతానికి చెందిన హెచ్ఐవీ పాజిటివ్ అయిన ఓ గర్భిణీకి ఈనెల 25న పురిటి నొప్పులు రాగా.. కుడుములుగుమ్మ సీహెచ్సీకి తీసుకొచ్చాడు ఆమె భర్త. ఆసుపత్రిలో చేర్చుకున్నారు. ఆ సమయంలో ఆసుపత్రిలో వైద్యులెవరూ లేకపోవటం వల్ల గర్భిణీని పరీక్షించిన స్టాఫ్ నర్స్.. హెచ్ఐవీ పాజిటివ్ వ్యక్తి అని డెలివరీ చేసేందుకు నిరాకరించింది. మల్కాన్గరి జిల్లా ఆసుపత్రికి తీసుకెళ్లాలని చెప్పింది. జిల్లా కేంద్రానికి వెళ్లేందుకు తన వద్ద డబ్బులు లేవని, ఇంటికి వెళ్లిపోయేందుకు అంబులెన్స్ ఏర్పాటు చేయాలని కోరాడు గర్భిణీ భర్త. కోపగించుకున్న స్టాఫ్ నర్స్ నడుచుకుంటూ వెళ్లిపోవాలని బెదిరించింది.
చేసేదేమీ లేక ద్విచక్రవాహనంపై నిండు గర్భిణీని తిరిగి ఇంటికి తీసుకొచ్చాడు ఆమె భర్త. ఇల్లు చేరిన తర్వాత పండంటి ఆడపిల్లకు జన్మనిచ్చింది బాధితురాలు. ఆమెకు ఇప్పటికే ఇద్దరు పిల్లలు ఉన్నారు. ఆమె భర్తకు హెచ్ఐవీ సోకటం వల్ల.. రెండో కాన్పు సమయంలో బాధితురాలికి హెచ్ఐవీ సోకింది. గత రెండేళ్లుగా మందులు వాడుతోంది. ప్రస్తుతం మూడో బిడ్డకు జన్మనివ్వగా.. గ్రామస్థులెవరూ వారి వద్దకు రాలేదు. దీంతో మనస్థాపం చెందిన కుటుంబ సభ్యులు ఆత్మహత్యకు ప్రయత్నించారు.
ఈ సంఘటన సమాచారం అందుకున్న జిల్లా అధికారులు దర్యాప్తు చేపట్టారు.
ఇదీ చూడండి:
