దేశంలో కొవిడ్-19 టీకా అందుబాటులోకి రానున్న నేపథ్యంలో పంపిణీపై దృష్టి సారించింది కేంద్రం. ఇప్పటికే అన్ని రాష్ట్రాలు సిద్ధం కావాలని ఆదేశించిన కేంద్ర వైద్య, ఆరోగ్య శాఖ.. తాజాగా 'కమ్యూనికేషన్ స్ట్రాటజీ'ని విడుదల చేసింది. టీకాపై ప్రజల్లో నెలకొన్న భయాలను తొలగించటం, వ్యాక్సిన్ తీసుకునేందుకు అంగీకారం తెలిపేలా చేసేందుకు కచ్చితమైన, పారదర్శక సమాచారాన్ని క్షేత్రస్థాయిలో చేరవేయటమే దీని ముఖ్య ఉద్దేశం.
ఈ మేరకు జాతీయ, రాష్ట్ర, జిల్లా స్థాయిలో కమ్యూనికేషన్ కార్యకలాపాలకు మార్గనిర్దేశం చేసేలా 88 పేజీల డాక్యుమెంట్ను విడుదల చేసింది ఆరోగ్య శాఖ.
డాక్యుమెంట్ ప్రకారం.. వ్యాక్సిన్ పట్ల ప్రజల్లో నెలకొన్న నిరాశను తొలగించటం సహా, టీకా భద్రత, సమర్థత పట్ల నెలకొన్న భయాలతో తలెత్తే సందేహాలను నివృత్తి చేయటం ఈ వ్యూహం లక్ష్యం. అలాగే టీకా ద్వారా ఎదురయ్యే రిస్క్లపై సమాచారం అందించటం, వ్యాక్సిన్ పంపిణీ సమయంలో తలెత్తే అనుకోని ఘటనల పట్ల అప్రమత్తంగా ఉండటం వంటివి కీలక అంశాలుగా ఉన్నాయి.
" కమ్యూనికేషన్లో పారదర్శకతతో కొవిడ్-19 వ్యాక్సిన్ పట్ల ప్రజల్లో నమ్మకం, విశ్వాసాన్ని పెంపొందించాలనేది ఈ వ్యూహం సూచిస్తోంది. అలాగే.. తప్పుడు సమాచారం, పుకార్ల వ్యాప్తిపైనా దృష్టి సారించనుంది. "
- కేంద్ర వైద్య, ఆరోగ్య శాఖ
ఈ లక్ష్యాన్ని మూడు పద్ధతుల్లో సాధించాలని యోచిస్తోంది కేంద్ర ఆరోగ్య శాఖ.
- మొదటి దాంట్లో.. వ్యాక్సిన్ పంపిణీ ఎప్పుడు, ఎలా, ఎవరికి, సమయం, తేదీ వంటి వివరాలపై నిపుణులు, అధికారులతో అవగాహన కల్పించటం, వ్యాక్సిన్ల భద్రత, సామర్థ్యాన్ని నొక్కి చెప్పటం, దశలవారీగా డ్రైవ్ నిర్వహించే నిర్ణయాన్ని వివరించటం వంటివి ఉన్నాయి.
- రెండోది.. రియల్ టైంలో స్పందించేందుకు నేషనల్ మీడియా రాపిడ్ రెస్పాన్స్ సెల్ (ఎన్ఎంఆర్ఆర్సీ)ను ఏర్పాటు చేయటం.
- మూడోది.. కమ్యూనిటీ మొబిలైజర్స్, ఫ్రంట్లైన్ వర్కర్స్ను భాగస్వామ్యులుగా చేసి కమ్యూనిటీ సంప్రదింపులు, మతపరమైన, యువజన సమావేశాలు, పౌర సమాజ సంస్థలు, ఎస్హెచ్జీలు, పంచాయతీలు, ఇతర కమ్యూనిటీ సంబంధిత ఫ్లాట్ఫాంల ద్వారా సమాచారాన్ని చేరవేయటం.
ఇదీ చూడండి: 'కొత్త ఏడాదిలో కొవిడ్ టీకాపై శుభవార్త'
