Panipat girl murdered: హరియాణా పానీపత్లో పాశవిక ఘటన వెలుగుచూసింది. రెండు రోజుల క్రితం అదృశ్యమైన ఓ ఏడేళ్ల చిన్నారి.. మంగళవారం అత్యంత దారుణ స్థితిలో విగతజీవిగా కనిపించింది. చిన్నారి నోటిలో రాళ్ల ముక్కలు ఉన్నాయి.
అసలేం జరిగిందంటే...
Haryana cirme news: పానీపత్లోని సమాలఖా గ్రామానికి చెందిన చిన్నారి.. మనానా గ్రామంలోని ఓ గుడి వద్ద అన్నదాన కార్యక్రమానికి ఆదివారం ఉదయం వెళ్లింది. సాయంత్రం వరకు అక్కడే ఆడుకుంటూ ఉన్న బాలిక.. ఆ తర్వాత అదృశ్యమైందని బంధువులు తెలిపారు. ఆ రాత్రికి ఇంటికి కూడా రాలేదని చెప్పారు.
అతడే తీసుకువెళ్లాడా?
ఎరుపు రంగు బైక్ మీద వచ్చిన ఓ వ్యక్తి సదరు చిన్నారిని తీసుకువెళ్లాడని ఆమెతో పాటు గుడి వద్ద ఆడుకుంటూ ఉన్న మిగతా పిల్లలు తెలిపారు. బైక్ మీద వచ్చిన వ్యక్తి మాస్కు ధరించాడని చెప్పారు. దీనిపై పోలీసులకు కుటుంబ సభ్యులు ఫిర్యాదు చేయగా.. పోలీసులు కేసు నమోదు చేసుకుని దర్యాప్తు చేపట్టారు.
అయితే.. రెండు రోజుల తర్వాత మంగళవారం సాయంత్రం బాలిక మృతదేహాన్ని మనాగా గ్రామంలోని ఓ స్టేడియం వద్ద పోలీసులు గుర్తించారు. చిన్నారి నోట్లో రాళ్ల ముక్కలు ఉన్నాయని తెలిపారు. బాలికపై అత్యాచారానికి పాల్పడి, హత్య చేశారని బాలిక కుటుంబ సభ్యులు అనుమానం వ్యక్తం చేశారు.
ఈ కేసు తీవ్రత దృష్ట్యా.. నిందితుల గురించి సమాచారం అందించినవారికి రూ.50,000 రివార్డు అందిస్తామని పానీపత్ ఎస్పీ ప్రకటించారు. నిందితులను పట్టుకునేందుకు పోలీసులు అనేక బృందాలుగా ఏర్పడి గాలింపు చేపట్టారు.
ఇదీ చూడండి: ప్రియురాలిపై కోపంతో.. ఇద్దరిని కత్తితో పొడిచాడు
