బంగాల్కు చెందిన మహానుభావులను భాజపా అవమానపరుస్తోందని బంగాల్ ముఖ్యమంత్రి మమతా బెనర్జీ మండిపడ్డారు. భారతీయ జనతా పార్టీగా ఉన్న పేరును 'భారత్ జలావ్ పార్టీ' (దేశాన్ని నాశనం చేసే పార్టీ)గా మార్చుకోవాలని ఎద్దేవా చేశారు.
హుగ్లీలో ఎన్నికల ప్రచారం నిర్వహించారు మమత. ఈ నేపథ్యంలో నేతాజీ సుభాష్ చంద్రబోస్ జయంతి నాడు తనను భాజపా అవమానించిందని ఆవేదన వ్యక్తం చేశారు.
"నేతాజీ సుభాష్ చంద్రబోస్ అందరి నేత. కానీ వాళ్లు(భాజపా).. ప్రధాని సమక్షంలోనే నన్ను అవమానించారు. నేను తుపాకులను నమ్మను. రాజకీయాలను విశ్వసిస్తాను. భాజపా నేతాజీతో పాటు బంగాల్ను కూడా అవమానించింది."
--- మమతా బెనర్జీ, బంగాల్ ముఖ్యమంత్రి.
విక్టోరియా మెమోరియల్లో ఏర్పాటు చేసిన వేడుకల్లో ప్రధాని మోదీతో పాటు, మమత కూడా పాల్గొన్నారు. ఆమె ప్రసంగించేందుకు వెళుతున్న సమయంలో కొందరు మమతకు వ్యతిరేకంగా నినాదాలు చేశారు. 'జై శ్రీరామ్' నినాదాలు కూడా వినపడ్డాయి. 'అతిథులతో ప్రవర్తించే తీరు ఇదేనా?' అని ప్రశ్నిస్తూ.. తనకు జరిగిన దానికి నిరసనగా మమత ప్రసంగించకుండా వెనుదిరిగారు.
'త్వరగా వెళ్లిపోండి..'
ఇటీవలి కాలంలో తృణమూల్ కాంగ్రెస్ నేతలు ఒక్కొక్కరుగా పార్టీని వీడుతున్నారు. దీనిపై స్పందించిన మమత.. పార్టీని వీడాలి అనుకునేవారు త్వరగా వెళ్లిపోవాలని పేర్కొన్నారు. తృణమూల్ కాంగ్రెస్ దేనికీ భయపడదని స్పష్టం చేశారు. ఎన్నికల్లో టికెట్ ఇవ్వమని తెలిసే వారందరూ వీడుతున్నారని అభిప్రాయపడ్డారు.
ఇదీ చూడండి:- బంగాల్ బరి: అలజడుల నందిగ్రామ్లో గెలుపెవరిది?
