గుజరాత్ ఎన్నికల బరిలో దిగిన ఆమ్ ఆద్మీ పార్టీ.. తమ అభ్యర్థుల విషయంలో జాగ్రత్తపడుతోంది. సూరత్ ఈస్ట్ అభ్యర్థి కంచన్ జరీవాలా బుధవారం తన నామినేషన్ను వెనక్కి తీసుకున్న నేపథ్యంలో.. ఇలాంటి ఘటనలు పునరావృతం కాకుండా చర్యలు చేప్టటింది. ఎట్టి పరిస్థితుల్లోనూ నామినేషన్లు విత్డ్రా చేసుకోకూడదని అభ్యర్థులకు సూచించింది. సూరత్కు చెందిన పార్టీ అభ్యర్థులను గుర్తు తెలియని ప్రాంతానికి తరలించింది. నగరానికి అవతల ఓ ప్రాంతానికి వీరిని తీసుకెళ్లినట్లు తెలుస్తోంది. సూరత్లోని స్థానాల్లో నామినేషన్ల ఉపసంహరణకు గురువారమే ఆఖరి రోజు కావడం వల్ల ఈ మేరకు జాగ్రత్తలు తీసుకుంటున్నట్లు సమాచారం. అయితే ఆప్ వర్గాలు మాత్రం.. వీరందరినీ ఓ సమావేశం కోసం పిలిచామని అంటున్నాయి. అభ్యర్థులంతా తమతమ నియోజకవర్గాల్లో ప్రచారం చేసుకుంటున్నారని ఆప్ ప్రతినిధి యోగేశ్ జద్వానీ పేర్కొన్నారు.
కాగా, బుధవారం తన నామినేషన్ను ఉపసంహరించుకున్న కంచన్ జరీవాలా.. తనకు రక్షణ కల్పించాలంటూ పోలీసులకు లేఖ రాశారు. తన ప్రాణానికి హాని ఉందని, కాంగ్రెస్ అభ్యర్థి అస్లాం సైకిల్వాలా మనుషులు తనను చంపేందుకు ప్రయత్నిస్తున్నారని చెప్పారు. తనకు భద్రత కల్పించాలని కోరుతూ సూరత్ పోలీస్ కమిషనర్ను అభ్యర్థించారు.
జరీవాలా.. మంగళవారం కనిపించకుండా పోయారు. బుధవారం నేరుగా రిటర్నింగ్ అధికారి కార్యాలయంలో ప్రత్యక్షమైన జరీవాలా.. తన నామినేషన్ను వెనక్కి తీసుకున్నారు. అయితే, ఆయన్ను భాజపా కిడ్నాప్ చేసిందని ఆప్ ఆరోపణలు చేసింది. భాజపా ఒత్తిడి వల్లే ఆయన.. నామినేషన్ ఉపసంహరించుకోవాల్సి వచ్చిందని ఆప్ ఆరోపించగా.. కమలదళం తోసిపుచ్చింది.
