Girl murdered by boyfriend: ముంబయిలోని వెర్సోవా బీచ్లో కొద్ది రోజుల క్రితం 18 ఏళ్ల యువతి మృతదేహం లభించటం కలకలం రేపింది. ఈ కేసును వారం రోజుల్లోనే ఛేదించారు పోలీసులు. బాధితురాలి మాజీ ప్రేమికుడిని పోలీసులు శనివారం అరెస్ట్ చేశారు. మృతురాలు గోరేగావ్లోని ప్రేమ్నగర్లో ఉంటూ నీట్ పరీక్షకు సన్నద్ధమవుతున్నట్లు పోలీసులు తెలిపారు. నిందితుడు సైతం అదే ప్రాంతానికి చెందిన వాడిగా చెప్పారు.
"యువతి మృతి కేసులో మొబైల్ కాల్స్, చాట్స్, బంధువులు ఇచ్చిన సమాచారంతో ప్రేమ్నగర్కు చెందిన మొహమ్మద్ షాజెబ్ అన్సారీని (23) అరెస్ట్ చేశాం. ఇరువురు కొద్ది రోజులు ప్రేమించుకుని విడిపోయారు. ఏప్రిల్ 25న సాయంత్రం 4 గంటలకు బాధితురాలు ట్యూషన్ కోసం ఇంటి నుంచి వెళ్లింది. తిరిగి రాలేదు. ట్యూషన్ క్లాస్కు వెళ్లకుండా స్నేహితుల ఇంటికి వెళ్లింది. రాత్రి 9.30 దాటినా తిరిగి ఇంటికి రాకపోయే సరికి సోనమ్ తండ్రి ఫిర్యాదు చేశాడు. తన స్నేహితుల ఇంట్లో కాసేపు ఉండి వస్తానని చెప్పిందని, రాత్రి 11.30 దాటినా రాలేదని పేర్కొన్నాడు. 11 గంటల ప్రాంతంలో బాధితురాలి ఫోన్ స్విచ్ఆఫ్ అయినట్లు చెప్పాడు. "
- గోరేగావ్ వెస్ట్ పోలీసులు
ఏప్రిల్ 28న వెర్సోవా బీచ్లో కుళ్లిపోయిన స్థితిలో బాధితురాలి మృతదేహాన్ని గుర్తించారు పోలీసులు. ఆ తర్వాత మృతికి గల కారణాలపై దర్యాప్తు చేపట్టారు. నిందితుడు అన్సారీని అరెస్ట్ చేసి విచారించగా.. నేరం అంగీకరించాడు. బాధితురాలు ఏప్రిల్ 25 రాత్రి అన్సారీ ఇంటికి వెళ్లింది. ఇరువురి మధ్య గొడవ జరిగింది. ఆగ్రహించిన అన్సారీ ఇంటర్నెట్ కేబుల్తో గొంతుకోసి చంపాడు. ఆ తర్వాత చేతులు, కాళ్లు కట్టేసి మృతదేహాన్ని గోనె సంచిలో పెట్టి సముద్రంలో పడేశాడు. రాత్రి 10 తర్వాత ఈ ఘటన జరిగినట్లు పోలీసులు తెలిపారు. నిందితుడిపై ఐపీసీ సెక్షన్ 201, 302 కింద కేసు నమోదు చేసి దర్యాప్తు చేపట్టారు.
రెండు కళ్లు పొడిచాడు: ఉత్తర్ప్రదేశ్లోని శ్రావస్తీ జిల్లాలో అమానుష ఘటన వెలుగు చూసింది. భర్తను కోల్పోయి ఒంటరిగా ఉండి.. భిక్షాటన చేస్తూ జీవిస్తున్న మహిళను భోజనం పెడతాననే కారణంతో ఇంట్లోకి తీసుకెళ్లి అత్యాచారం చేయబోయాడు సోనవా గ్రామానికి చెందిన దినేశ్ సింగ్ అనే యువకుడు. ఆమె ప్రతిఘటించే సరికి కోపంతో ఆమె రెండు కళ్లలో పదునైన ఆయుధంతో పొడిచాడు. ఆ తర్వాత ఇంట్లో నుంచి లాక్కొచ్చి బయటపడేశాడు. గమనించిన స్థానికులు ఆమె కుటుంబ సభ్యులకు సమాచారం అందించారు. వెంటనే జిల్లా ఆసుపత్రికి తరలించారు. సంఘటనా స్థలాన్ని పరిశీలించిన ఎస్పీ అరవింద్ కుమార్ మౌర్య.. బాధితురాలి కుటుంబ సభ్యులతో మాట్లాడారు. వారి ఫిర్యాదు మేరకు అత్యాచార యత్నం సహా వివిధ సెక్షన్ల కింద కేసు నమోదు చేశారు.
కుమార్తెపై తండ్రి అత్యాచారం: 18 ఏళ్ల కూతురిపై తండ్రి అత్యాచారానికి పాల్పడిన అమానవీయ ఘటన ఉత్తర్ప్రదేశ్లోని బాందా జిల్లాలో గురువారం జరిగింది. తండ్రే అఘాయిత్యం చేయటం వల్ల మనస్తాపంతో ఉరివేసుకుని ఆత్మహత్య చేసుకుంది బాధితురాలు. జిల్లాలోని మార్కా పోలీస్ స్టేషన్ పరిధిలోని గ్రామంలో ఈ ఘటన జరిగినట్లు ఏఏస్పీ లక్ష్మీ నివాస్ మిశ్రా తెలిపారు. గత గురువారం రాత్రి తండ్రి అఘాయిత్యానికి పాల్పడగా.. శుక్రవారం ఆత్మహత్య చేసుకున్నట్లు చెప్పారు. నిందితుడిని అరెస్ట్ చేసి విచారణ చేపట్టామన్నారు.
ఇదీ చూడండి: 'పెళ్లికి తొందరెందుకు..? గర్భనిరోధక బాధ్యత మహిళలదే!'
