Free gas cylinder in UP: ఉత్తర్ప్రదేశ్ అసెంబ్లీ ఎన్నికల్లో ఇచ్చిన హామీలను నెరవేర్చేందుకు భాజపా సిద్ధమైంది. హోలీ రోజు కోటీ మంది లబ్ధిదారులకు ఉచిత గ్యాస్ సిలిండర్లు పంపిణీ చేయనున్నట్లు తెలుస్తోంది. ఈ పథకానికి సుమారు రూ.వెయ్యి కోట్లు అవుతుందని అంచనా. ప్రధానమంత్రి ఉజ్వల పథకం కింద లబ్ధిదారులకు ఈ సిలిండర్లు అందనున్నాయి.
భాజపా మేనిఫెస్టోలో పొందుపరిచిన ఎన్నికల హామీలను నెరవేర్చేందుకు ఉత్తరప్రదేశ్ ప్రభుత్వ ప్రధాన కార్యదర్శి దుర్గాశంకర్ మిశ్రా క్రియాశీలకంగా వ్యవహరిస్తున్నారు. ఈ మేరకు అధికారులతో సమావేశాలు నిర్వహిస్తున్నారు.
60 ఏళ్లు దాటిన మహిళలందరికీ ప్రభుత్వ బస్సుల్లో ఉచిత ప్రయాణ సౌకర్యాన్ని కల్పించనున్నట్లు సమాచారం. చదువులో మెరుగ్గా రాణిస్తున్న విద్యార్థినులకు స్కూటీలు పంపిణీ చేసే విషయంపైనా భాజపా దృష్టిపెట్టింది.
ఇటీవల జరిగిన ఉత్తర్ప్రదేశ్ ఎన్నికల్లో మొత్తం 403 నియోజకవర్గాలకుగానూ 273 స్థానాలను భాజపా కైవసం చేసుకుంది. 125 సీట్లు దక్కించుకున్న ఎస్పీ కూటమి ప్రధాన ప్రతిపక్షంగా అవతరించింది. కాంగ్రెస్ 2 స్థానాలు, బీఎస్పీ ఒక స్థానానికి పరిమితమైంది.
ఇదీ చదవండి: యూపీ కోసం మళ్లీ రంగంలోకి అమిత్ షా
