ఓ అపార్ట్మెంట్ ప్రారంభోత్సవం సందర్భంగా వేదిక ఏర్పాటు చేస్తుండగా విద్యుత్తీగ తాకి నలుగురు అక్కడికక్కడే మృతిచెందారు. ఈ ఘటన బెంగళూరు అనేకల్లో జరిగింది.
ఇదీ జరిగింది...
అత్తిబెలె-సర్జాపూర్ రోడ్ ఇండ్లబెలె ప్రాంతంలో ఇటీవలే నిర్మించిన జీఆర్ కల్చర్ అపార్ట్మెంట్ ఓపెనింగ్ కోసం ఓ వేదిక ఏర్పాటు చేస్తుండగా ఈ దుర్ఘటన జరిగింది. అనుకోకుండా 11కేవీ విద్యుత్ తీగను తాకి నలుగురు వర్కర్లు మృతిచెందగా.. ఇద్దరు కోమాలోకి వెళ్లారు. మరో నలుగురికి తీవ్రంగా గాయాలయ్యాయి. ప్రస్తుతం బాధితులు యడవణహళ్లి ఆసుపత్రిలో చికిత్స పొందుతున్నారని అధికారులు తెలిపారు.
మరో ఘటనలో నలుగురు..
రాజస్థాన్ నాగౌర్ జిల్లాలో ఘోర రోడ్డు ప్రమాదం జరిగింది. వేగంగా వెళ్తోన్న ట్రక్కు ఢీ కొట్టడం వల్ల ద్విచక్రవాహనాలపై వెళ్తున్న నలుగురు యువకులు అక్కడికక్కడే మృతిచెందారు. బుధవారం రాత్రి లంగౌడ్ జాతీయ రహదారి 458పై ఈ ప్రమాదం జరిగిందని అధికారులు పేర్కొన్నారు.
