కుటుంబ కలహాలతో భార్యభర్తల మధ్య గొడవలు ఒకరినొకరు చంపుకొనే దాకా వెళ్లిన ఘటనలు ఇటీవల పెరిగాయి. అలాంటి ఘటనే రాజస్థాన్ చురు జిల్లాలో జరిగింది. భర్త వేధింపులు తాళలేక ఓ భార్య.. అతనికి కరెంట్ షాక్ ఇచ్చి హత్యాయత్నం చేసిన ఘటన కలకలం సృష్టించింది. బాధితుడు ప్రస్తుతం జిల్లాలోని బికనేర్ ప్రభుత్వ ఆసుపత్రిలో చికిత్స పొందుతున్నట్లు పోలీసులు తెలిపారు.
ఇదీ జరిగింది..
ఫిర్యాదు ప్రకారం.. ఆగస్టు 12న సాయంత్రం బాధితుడు మహేంద్ర దాన్(32) పనికి వెళ్లి ఇంటికి వచ్చాడు. కొద్దిసేపటి తర్వాత భర్తకు భోజనం వడ్డించింది అతని భార్య సుమన. ఈ క్రమంలోనే మహేంద్ర స్పృహ కోల్పోయాడు. ఆ తర్వాత అతని చేతులను పాలిథిన్ బ్యాగులు, కాళ్లను విద్యుత్తు తీగలతో కట్టేసింది భార్య. ఆ తర్వాత కరెంట్ షాక్ పెట్టింది. దాంతో అతనికి మెలుకువ వచ్చింది. భయపడిన సుమన.. వెంటనే ఇరుగుపొరుగువారిని పిలిచి, తన భార్తకు విద్యుత్తు షాక్ కొట్టిందని, ఆసుపత్రికి తీసుకెళ్లాలని తెలిపింది. స్థానికుల సాయంతో అదే రాత్రి స్థానిక ఆసుపత్రికి తరలించారు. మెరుగైన చికిత్స నిమిత్తం అక్కడి నుంచి బికనేర్ జిల్లా పీబీఎం ప్రభుత్వ ఆసుపత్రికి తరలించారు. ప్రస్తుతం బాధితుడి ఆరోగ్యం నిలకడగా ఉన్నట్లు అధికారులు తెలిపారు.
బాధితుడు ఇచ్చిన ఫిర్యాదు మేరకు మహిళపై హత్యాయత్నం కేసు నమోదు చేసినట్లు పోలీసు అధికారి హిమ్మత్ సింగ్ తెలిపారు. బాధితుడు, అతని తండ్రి వాంగ్మూలాలు నమోదు చేశామని, దర్యాప్తు చేపట్టామన్నారు. అయితే.. ఇప్పటి వరకు సుమనను అరెస్ట్ చేయలేదన్నారు.
ఇదీ చూడండి: కదిలే కారులో యువతిపై సామూహిక అత్యాచారం
