ఇంటి కరెంట్ బిల్లు రూ.1500 వస్తే.. పొరపాటుగా రూ.1,50,000 అని వేశారు విద్యుత్ శాఖ అధికారులు. బిల్లు కట్టలేనని చెప్పిన ఆ రైతును కుటుంబ సభ్యుల ముందే కొట్టారు. మనస్తాపం చెందిన ఆ రైతు ఉరేసుకొని ఆత్మహత్య చేసుకున్నాడు. ఈ ఘటన ఉత్తర్ప్రదేశ్లోని అత్రౌలీ తెహ్సిల్లో శనివారం జరిగింది.
సునైరా గ్రామానికి చెందిన ఆ రైతు పేరు రామ్జీ లాల్. అతనికి ఇంటి విద్యుత్ బిల్లు రూ.1,50,000 వచ్చింది. అయితే తనకు అంత బిల్లు రాలేదని, ఆ డబ్బు కట్టే స్థోమత తన దగ్గరలేదని విద్యుత్ శాఖ అధికారులకు విన్నవించుకున్నాడు. అయితే, ఆయన అభ్యర్థనను పక్కనబెట్టి.. కుటుంబ సభ్యుల ముందే కొట్టారు. మనస్థాపంతో రామ్జీ లాల్ బలవన్మరణానికి పాల్పడ్డాడు.
రైతు మృతికి కారణమైన విద్యుత్ శాఖ అధికారులను వెంటనే అరెస్టు చేయాలని మృతదేహంతో విద్యుత్ కార్యాలయం ముందు ధర్నా చేశారు బాధితుడి బంధువులు. తప్పు చేసిన వారిపై చర్యలు తీసుకుంటామని పోలీసులు హామీ ఇచ్చారు.
బిల్లు రూ. 1500 వస్తే విద్యుత్ శాఖ అధికారులే తప్పుగా వేశారని మృతుడి మేనల్లుడు రామ్చరణ్ తెలిపాడు. పొరపాటుగా పడిన బిల్లును మార్చాలని విద్యుత్ శాఖ అధికారుల చుట్టూ రామ్జీ లాల్ తిరిగాడని అయినా వాళ్లు పట్టించుకోలేదని వాపోయాడు.
ఇదీ చూడండి: థన్‌బర్గ్‌ టూల్‌కిట్‌ కేసులో పోలీసు కస్టడీకి దిశ
