మహమ్మారి వ్యాప్తి కారణంగా ఇప్పుడు ఉన్నతస్థాయి, కీలక సమావేశాలన్నీ వీడియో విధానంలోనే జరుగుతున్నాయి. ఇదే అదనుగా కొందరు సైబర్ మోసగాళ్లు ఈ సమావేశాల్లోకి రహస్యంగా చొరబడి, సమాచారాన్ని సేకరించడం పెద్ద బెడదగా మారింది. ఇలాంటి వారి ఆట కట్టించేందుకు పంజాబ్‌లోని ఐఐటీ-రోపర్, ఆస్ట్రేలియాలోని మోనాష్‌ యూనివర్సిటీ శాస్త్రవేత్తలు ప్రత్యకంగా ఓ డిటెక్టర్ సాఫ్ట్వేర్ను అభివృద్ధి చేశారు. దీని పేరు 'ఫేక్‌బస్టర్‌'. మొహానికి మార్పులు చేసి, సామాజిక మాధ్యమాల్లో ఇతరులను కించపరిచేలా పెట్టే పోస్టులను కూడా ఇది ఇట్టే పట్టేస్తుందట!
"ముఖాలకు ముసుగు ధరించి ఇతరులెవరైనా వెబినార్, వర్చువల్‌ సమావేశాల్లో పాల్గొంటే, ఆ విషయాన్ని ఫేక్‌బస్టర్‌ ద్వారా సులభంగా తెలుసుకోవచ్చు. జూమ్, స్కైప్‌ అప్లికేషన్ల ద్వారా దీన్ని పరీక్షించాం. ఆన్లైన్, ఆఫ్‌లైన్‌ విధానాల్లో ఇది విజయవంతంగా పనిచేస్తోంది. నకిలీ ఆడియోలను కూడా గుర్తించేలా దీన్ని మరింత అభివృద్ధి చేస్తున్నాం. ప్రస్తుతానికి డెస్క్‌టాప్, ల్యాప్‌టాప్‌లో మాత్రమే ఈ సాఫ్ట్‌వేర్‌ పనిచేస్తుంది. మొబైల్‌ ఫోన్లు, ఇతర చిన్న పరికరాల కోసం త్వరలోనే మరో అప్లికేషన్‌ను అందుబాటులోకి తెస్తాం".
-- రామనాథన్‌ సుబ్రమణియన్‌, ఐఐటీ-రోపర్ అసోసియేట్‌ ప్రొఫెసర్‌
ఆన్లైన్ పరీక్షలు, ఇంటర్వ్యూల్లో ఇతరుల తరఫున హాజరయ్యే వారిని ఈ సాఫ్ట్‌వేర్‌లోని 'డీప్‌ఫేక్స్‌' టూల్‌ సాయంతో పట్టుకోవచ్చని మరో పరిశోధనకర్త అభినవ్‌ ధాల్‌ చెప్పారు.
ఇదీ చదవండి : టిక్ టాక్ ఫౌండర్ ఝాంగ్ సంచలన నిర్ణయం
