కేరళ మాజీ ఎంపీ జోస్ జార్జ్.. రాహుల్ గాంధీపై తీవ్ర వ్యాఖ్యలు చేశారు. కాంగ్రెస్ మాజీ అధ్యక్షుడు రాహుల్గాంధీకి పెళ్లికాలేదని, ఆయన పట్ల అమ్మాయిలు జాగ్రత్తగా ఉండాలంటూ అభ్యంతరకర వ్యాఖ్యలు చేశారు.
కేరళ ఎన్నికల ప్రచారంలో భాగంగా ఇటీవల రాహుల్ గాంధీ కొచ్చిలోని మహిళల కళాశాలను సందర్శించి, విద్యార్థినులకు మార్షల్ ఆర్ట్స్ శిక్షణ ఇవ్వడాన్ని పరోక్షంగా ప్రస్తావిస్తూ ఈ వ్యాఖ్యలు చేశారు జార్జ్. వామపక్ష అభ్యర్థి, మంత్రి ఎమ్ఎమ్ మణి తరఫున కేరళలోని ఇడుక్కై ఎన్నికల ప్రచారంలో జార్జ్ చేసిన ఈ వ్యాఖ్యలపై పెద్ద దుమారం రేగింది.
కాంగ్రెస్ పార్టీ సదరు వ్యాఖ్యల్ని ఖండించింది. ఆయనను అరెస్టు చేయాలని డిమాండ్ చేసింది. రాహుల్ గాంధీపై వ్యక్తిగత దూషణలు చేయడం తగదని సీపీఎం నేత, సీఎం పినరయి విజయన్ అన్నారు. రాహుల్ గాంధీ రాజకీయంగానే తమకు విరోధి అని, వ్యక్తిగతంగా కాదని స్పష్టం చేశారు. మహిళల్ని కించపరిచే వ్యాఖ్యలేవీ జార్జ్ చేయలేదని, రాహుల్ను మాత్రమే విమర్శించారని మంత్రి ఎమ్ఎమ్ మణి అన్నారు.
2014 లోక్సభ ఎన్నికల్లో వామపక్ష కూటమి మద్దతుతో స్వతంత్ర అభ్యర్థైన జోస్ జార్జ్ గెలిచారు.
ఇదీ చదవండి: విద్యార్థులతో స్టెప్పులేసి అదరగొట్టిన రాహుల్
