Encounter in Jammu Kashmir: జమ్ముకశ్మీర్లో శుక్రవారం తెల్లవారుజామున జరిగిన ఎన్కౌంటర్లో ఇద్దరు ముష్కరులను భద్రతాదళాలు మట్టుబెట్టాయి. పోలీసుల కాల్పుల్లో హతమైన ఇద్దరు ఉగ్రవాదులు పాకిస్థాన్కు చెందిన జైషే మహ్మద్ ఉగ్రసంస్థ ఆత్మాహుతి దళానికి చెందిన వారని వెల్లడించారు జమ్ముకశ్మీర్ డీజీపీ దిల్బాగ్ సింగ్. ప్రధానమంత్రి నరేంద్ర మోదీ జమ్ముకశ్మీర్ పర్యటనలో విధ్వంసం సృష్టించాలనే కుట్రతోనే వారు సరిహద్దులు దాటి భారత్లోకి ప్రవేశించారని తెలిపారు.
" గత రాత్రి నుంచి పోలీసులు, ఇతర భద్రతా సిబ్బంది ఉగ్రవాదుల ఏరివేత ఆపరేషన్లో పాల్గొన్నారు. జైషే ఆత్మాహుతి దళానికి చెందిన ఇద్దరు ఉగ్రవాదులు హతమయ్యారు. వారు సైనిక స్థావరాన్ని లక్ష్యంగా చేసుకుని భారీ విధ్వంసం సృష్టించేందుకు వచ్చారు. ప్రధాని మోదీ పర్యటనకు రెండు రోజుల ముందు ఈ ఎన్కౌంటర్ జరిగింది. జమ్ముకశ్మీర్లో శాంతిభద్రతలకు విఘాతం కలిగించేందుకు, ప్రధాని పర్యటనలో విధ్వంసం సృష్టించేందుకు జరిగిన భారీ కుట్ర ఇది. మాకు సరైన సమయంలో సమాచారం అందటం వల్ల ఆపరేషన్ను విజయవంతంగా పూర్తి చేశాం."
- దిల్బాగ్ సింగ్, జమ్ముకశ్మీర్ డీజీపీ
5 గంటలు సాగిన గన్ఫైట్: జమ్మూ శివారు ప్రాంతంలోని సుంజ్వాన్ ఆర్మీ క్యాంప్ సమీపంలో తెల్లవారుజామున 4.25 గంటల సమయంలో ముష్కరుల కదలికలను గమనించిన భద్రతా దళాలు కాల్పులు జరిపాయి. వారి నుంచి తప్పించుకునేందుకు నివాస ప్రాంతాల్లోకి పారిపోయారు ఉగ్రవాదులు. వారిని మట్టుబెట్టేందుకు నిర్భంద తనిఖీలు చేపట్టగా కాల్పులకు పాల్పడ్డారు. సుమారు 5 గంటల పాటు జరిగిన ఈ ఎన్కౌంటర్లో ఇద్దరు ఉగ్రవాదులు హతమయ్యారు. ఓ సీఐఎస్ఎఫ్ అసిస్టెంట్ సబ్ ఇన్స్పెక్టర్ వీరమరణం పొందారు. మరో తొమ్మిది మంది భద్రతా సిబ్బంది గాయపడ్డారు. ఉగ్రవాదుల నుంచి భారీగా ఆయుధాలు, గ్రెనేడ్లు, ఆత్మాహుతి దాడికి సంబంధించిన సామగ్రిని స్వాధీనం చేసుకున్నామని తెలిపారు డీజీపీ. ఉగ్రమూకల కదలికల నేపథ్యంలో తనిఖీలు ముమ్మరం చేశామన్నారు. ప్రాథమిక దర్యాప్తు ప్రకారం ఉగ్రవాదులు సాంబాలోని అంతర్జాతీయ సరిహద్దు గుండా గత గురువారం జమ్మూ నగరంలోకి ప్రవేశించారని.. ఆర్మీ క్యాంప్కు సమీపంలోని నివాస ప్రాంతంలో తలదాచుకున్నట్లు గుర్తించినట్లు చెప్పారు.
మోదీ పర్యటన: ఈ నెల 24న జాతీయ పంచాయతీ రాజ్ దినోత్సవాన్ని పురస్కరించుకుని ప్రధాని నరేంద్ర మోదీ జమ్మూలోని పాలి గ్రామాన్ని సందర్శించనున్నారు. 2019లో జమ్ముకశ్మీర్ ప్రత్యేక ప్రతిపత్తి హోదా రద్దు అనంతరం తొలిసారిగా జమ్మూలో పర్యటించనున్నారు. అంతకుముందు 2019 అక్టోబర్ 27న రాజౌరి, నవంబర్ 3 2021న నౌషేరా సెక్టార్లో జవాన్లతో కలిసి మోదీ దీపావళి వేడకులు చేసుకున్నారు.
ఇదీ చూడండి: కోర్టు ఆవరణలో కాల్పులు - క్లయింట్ల మధ్య గొడవే కారణం
Attack on RI: అక్రమ మట్టి తవ్వకాలు.. అడ్డుకున్న ఆర్ఐపై దాడి
