మహారాష్ట్ర హోంమంత్రి అనిల్ దేశ్ముఖ్పై ముంబయి మాజీ పోలీస్ కమిషనర్ పరమ్బీర్ సింగ్ చేసిన ఆరోపణలపై ఎన్సీపీ అధినేత శరద్ పవార్ స్పందించారు. ఇవి తీవ్రమైన ఆరోపణలని, దీనిపై లోతైన దార్యప్తు జరగాలని అభిప్రాయపడ్డారు. ఈ మొత్తం వ్యవహారంతో పాటు, అనిల్ దేశ్ముఖ్ను పదవి నుంచి తప్పించే విషయంపై సీఎం ఉద్ధవ్ ఠాక్రేనే నిర్ణయం తీసుకుంటారని పవార్ స్పష్టం చేశారు.
సచిన్ వాజేను పోలీసు శాఖలోకి తిరిగి రప్పిస్తూ గతేడాది తీసుకున్న నిర్ణయంతో సీఎం ఉద్ధవ్ ఠాక్రేకు గానీ, హోంమంత్రి అనిల్ దేశ్ముఖ్కు గానీ ఎలాంటి సంబంధం లేదని పవార్ చెప్పారు. వాజేను తిరిగి పోలీసు శాఖలోకి తీసుకుంది పరమ్బీర్ సింగే అని తెలిపారు. ఆయనను కమిషనర్ పదవి నుంచి తప్పించాకే హోంమంత్రిపై ఆరోపణలు చేస్తున్నారని పేర్కొన్నారు.
రాష్ట్రంలో మహావికాస్ అఘాడీ(శివసేన-ఎన్సీపీ-కాంగ్రెస్ కూటమి) ప్రభుత్వాన్ని అస్థిరపరిచేందుకు కుట్రలు జరుగుతున్నాయని పవార్ ఆరోపించారు. హోంమంత్రిపై వచ్చిన ఆరోపణలు సంకీర్ణ ప్రభుత్వంపై ఎలాంటి ప్రభావం చూపవని అన్నారు. ఈ విషయంలో మాజీ ఐపీఎస్ అధికారి జులియో రిబీరో సాయం తీసుకోవాలని సీఎం ఉద్ధవ్ ఠాక్రేకు సూచిస్తానని పవార్ చెప్పారు.
హోంమంత్రి రాజీనామా చేయాలి..
హోంమంత్రి అనిల్ దేశ్ముఖ్ పదవిలో ఉన్నంత వరకు ఈ వ్యవహారంపై దర్యాప్తు చేపట్టడం సాధ్యం కాదని మహారాష్ట్ర ప్రతిపక్షనేత, మాజీ సీఎం దేవేంద్ర ఫడణవీస్ అన్నారు. అందుకే అనిల్ దేశ్ముఖ్ హోంమంత్రి పదవికి రాజీనామా చేయాలని డిమాండ్ చేశారు.
లేఖ దుమారం..
హోంమంత్రి అనిల్ దేశ్ముఖ్ తన పదవిని దుర్వినియోగం చేశారని ఆరోపిస్తూ పరమ్బీర్ సింగ్ ఠాక్రేకు లేఖ రాశారు. నెలకు రూ.100 కోట్లు సంపాదించాలని పోలీసు అధికారి సచిన్ వాజేకు అనిల్ దేశ్ముఖ్ ఆదేశాలు జారీ చేశారని అన్నారు. బార్లు, హోటళ్లు, రెస్టారెంట్ల నుంచి డబ్బులు వసూల్ చేయాలని చెప్పినట్లు తెలిపారు. ఈ ఆరోపణలను మంత్రి ఖండించారు.
ఇవీ చూడండి: 'లేఖ'పై మహాలో ప్రకంపనలు- పవార్ కీలక భేటీ!
