ED Raid on Patankar: మహారాష్ట్ర ముఖ్యమంత్రి ఉద్ధవ్ ఠాక్రే బంధువు కార్యాలయాలపై ఎన్ఫోర్స్మెంట్ డైరెక్టరేట్ మంగళవారం దాడులు చేసింది. మనీలాండరింగ్ కేసు దర్యాప్తులో భాగంగా ఈ రైడ్ నిర్వహించిన ఈడీ.. ఠాణెలోని నీలాంబరీ ప్రాజెక్టులో భాగమైన 11 రెసిడెన్షియల్ ఫ్లాట్లను అటాచ్ చేసింది. శ్రీసాయిబాబా గృహనిర్మితి ప్రైవేట్ లిమిటెడ్కు చెందిన ఈ ఆస్తులు ఠాక్రే బావమరిది (సతీమణి రష్మీ ఠాక్రే సోదరుడు).. శ్రీధర్ మాధవ్ పటాంకర్ పేరు మీద ఉన్నాయి. మొత్తం రూ.6.45 కోట్లు విలువ చేసే ఆస్తులను ఈడీ అటాచ్ చేసింది.
పుష్పక్గ్రూప్ మనీలాండరింగ్ కేసు దర్యాప్తులో భాగంగా సంబంధిత సంస్థ.. శ్రీధర్ మాధవ్కు చెందిన శ్రీసాయిబాబా గృహనిర్మితికి నగదును బదిలీ చేసినట్లు తమకు సమాచారం అందిందని ఈడీ వెల్లడించింది. పుష్పక్ గ్రూప్ కేసు నిందితుడు మహేశ్ పటేల్ మరో నిందితుడు నందకిశోర్ చతుర్వేది సాయంతో శ్రీధర్ మాధవ్ సంస్థలోకి నగదును బదిలీ చేసినట్లు తెలిపింది. దాదాపు రూ.50 కోట్లను శ్రీధర్ మాధవ్ సంస్థకు చెందిన రియల్ ఎస్టేట్ ప్రాజెక్టులలో పెట్టుబడిగా పెట్టినట్లు తెలిపింది.
'ఆ రాష్ట్రాల్లోనే ఈడీ పనిచేస్తోంది'
సీఎం ఠాక్రే బంధువు శ్రీధర్ మాధవ్ ఆస్తులను ఈడీ అటాచ్ చేయడంపై శివసేన నేత సంజయ్ రౌత్ స్పందించారు.
"భాజపా అధికారంలో లేని రాష్ట్రాల్లో మాత్రమే ఈడీ చర్యలు చేపడుతోంది. గుజరాత్ వంటి పెద్ద రాష్ట్రాల్లో ఈడీ కార్యాలయాలను మూసేసినట్టు ఉంది. అంతా మహారాష్ట్రలోనే జరుగుతున్నట్లు ఉంది. మమతా బెనర్జీ మేనల్లుడు అభిషేక్ బెనర్జీని కూడా ఇదే విధంగా వేధించారు. కానీ అటు బెంగాల్, ఇటు మహారాష్ట్ర రెండూ ఈ చర్యలకు లొంగిపోవు."
-సంజయ్ రౌత్, శివసేన ఎంపీ
అప్పుడు ఈడీ అంటే ఎవరికీ తెలియదు..
కేంద్ర దర్యాప్తు సంస్థలు అధికార దుర్వినియోగానికి పాల్పడుతున్నాయని ఆరోపించారు ఎన్సీపీ అధినేత శరద్ పవార్. "కొన్నేళ్ల క్రితం అసలు ప్రజలకు ఈడీ అంటే ఏంటో తెలియదు. కానీ ఇప్పుడు ఆ దర్యాప్తు సంస్థ అధికార దుర్వినియోగంతో గ్రామాల్లో ఉన్న ప్రజలకు కూడా తెలుస్తోంది." అని పవార్ వ్యాఖ్యానించారు.
ఇదీ చూడండి : '5 కోట్లు పెట్టుబడితో రూ.500 కోట్లు!'.. ఇరీడియం పేరుతో నటుడికి టోకరా
