కేవలం బంగాల్లో మాత్రమే కాదని ఎన్నికలు జరగనున్న మిగతా రాష్ట్రాలకు సైతం పోలీస్ బలగాలను పంపనున్నట్లు ఎన్నికల సంఘం స్పష్టం చేసింది. ఈ విధానం కొన్ని దశాబ్దాలుగా కొనసాగుతోందని తెలిపింది. ఎన్నికలు జరగనున్న రాష్ట్రాల్లోని సంక్లిష్టమైన ప్రాంతాల్లో ముందస్తు భద్రత కోసమే కేంద్ర పోలీస్ బలగాలను పంపించనున్నామని వివరించింది. కేవలం బంగాల్లో మాత్రమే పోలీస్ బలగాలను మోహరిస్తున్నారని వస్తున్న వార్తలను ఈసీ ఖండించింది. 2019 ఎన్నికల సమయంలోనూ అన్ని రాష్ట్రాలకు, కేంద్ర పాలిత ప్రాంతాలకు పోలీస్ బలగాలను పంపిస్తామని వివరించింది.
త్వరలో ఎన్నికలు జరగనున్న అసోం, కేరళ, తమిళనాడు, బంగాల్, పుదుచ్చేరిలో దాదాపు 25వేల మంది సెంట్రల్ పోలీస్ బలగాలను పంపించాలని సంబంధిత సెక్రటరీస్, డీజీపీలకు ఆదేశాలు జారీ చేసింది ఎన్నికల సంఘం.
బంగాల్కు ఎన్నికల అధికారి
బంగాల్లో ఎన్నికల నేపథ్యంలో బంగాల్ డిప్యూటీ ఎన్నికల కమిషనర్ సుదీప్ జైన్ బంగాల్లో శుక్రవారం పర్యటించనున్నారు. ఎన్నికల కసరత్తుపై జిల్లా కలెక్టర్లు, ఎస్పీలు, ఇతర అధికారులతో సమావేశం కానున్నట్లు పోల్ ప్యానెల్ తెలిపింది. ఎన్నికల వేళ రాష్ట్రంలో శాంతి భద్రత పై చర్చిస్తారని వివరించింది. అన్ని జిల్లాల్లో కేంద్ర పోలీస్ బలగాలను మోహరించటంపైనా అధికారులతో చర్చించనున్నట్లు పేర్కొంది. జైన్ పర్యటన అనంతరం... రిపోర్టును ఈసీకు అందిస్తారని స్పష్టం చేసింది.
294 అసెంబ్లీ సీట్లున్న బంగాల్లో ఏప్రిల్-మేలో ఎన్నికలు జరగనున్నాయి.
ఇదీ చదవండి : 'బంగాల్లో సిండికేట్ రాజ్యం- పైసలిస్తేనే పని'
