బ్లాక్, ఎల్లో, వైట్ ఫంగస్ పేరుతో మ్యూకోర్మైకోసిస్ కేసుల నమోదు పెరుగుతున్న నేపథ్యంలో ఈ శిలీంధ్ర వ్యాధి వ్యాప్తిపై ప్రజల్లో అవగాహన కల్పిస్తున్నారు అంటువ్యాధుల నిపుణులు. ఫంగస్ రంగుల గురించి ఆందోళన చెందవద్దని.. అది ఏ రకమైన ఇన్ఫెక్షనో, అందుకు గల కారణాలు, ఎదురయ్యే ముప్పును తెలుసుకోవడం ద్వారా సమస్యకు మెరుగైన పరిష్కారం లభిస్తుందని తెలిపారు. ఫంగస్లోని రకాలను బ్లాక్, వైట్, ఎల్లో అంటూ పేర్కొనడం ద్వారా ప్రజల్లో భయాందోళనలు వ్యక్తం అవుతున్నాయని ఐసీఎంఆర్కు చెందిన అంటువ్యాధుల విభాగ అధిపతి డాక్టర్ సమీరన్ పండా అన్నారు.
వాటిపై పరిశోధన అవసరం..
ఇటీవల ఉత్తర్ప్రదేశ్లోని గాజియాబాద్లో నమోదైన ఎల్లో ఫంగస్ కేసుపై డాక్టర్ సమీరన్ స్పందించారు. ఎల్లో ఫంగస్ బల్లులు వంటి రెప్టైల్స్లో ఎక్కువగా గుర్తిస్తామని.. అయితే ప్రస్తుతం మనుషుల్లో నమోదవుతున్న ఈ ఫంగస్ అదే రకానికి చెందినదా కాదా అనే విషయంపై పరిశోధన చేయాల్సి ఉందన్నారు.
'అసలు కారణం ఏంటి?'
మ్యూకోర్మైకోసిస్ వ్యాప్తికి గల కారణాలపై సమగ్ర దర్యాప్తు చేపట్టాలని ఇండియన్ ఇన్స్టిట్యూట్ ఆఫ్ పబ్లిక్ హెల్త్కు చెందిన ప్రొఫెసర్ డాక్టర్ గిరిధర బాబు అన్నారు.
"వైరల్, ఫంగల్ ఇన్ఫెక్షన్స్ ఎప్పుడూ ఉండేవే. కానీ రోగ నిరోధక శక్తి కారణంగా ఎవరిపైనా పెద్దగా ప్రభావం చూపేవి కావు. ఇప్పుడు పరిస్థితి మారింది. మొదటి దశలో కూడా లేని ఈ పరిస్థితి ఇప్పుడు రావడం వెనుక కారణాలు ఏంటో తెలుసుకోవాలి. లేదంటే మెరుగైన పరిష్కారం లభించదు."
-ప్రొఫెసర్ డాక్టర్ గిరిధర బాబు, ఇండియన్ ఇన్స్టిట్యూట్ ఆఫ్ పబ్లిక్ హెల్త్
ఇదీ చదవండి : 'ఫంగస్లలో భిన్నమైన రంగులు అందుకే'
