ఉత్తర్ప్రదేశ్ ఫతేపుర్ జిల్లాకు చెందిన ఓ భక్తుడు దేవుడిపై తనకున్న అపారమైన భక్తిని వినూత్నంగా చాటుకున్నాడు. ఏకంగా తన నాలుకనే కోసుకొని అమ్మవారికి నైవేద్యంగా సమర్పించాడు. వృద్ధుడు చేసిన ఈ పనితో స్థానికంగా తీవ్ర కలకలం రేగింది. ఈ ఘటనతో భక్తులు దేవి ఆలయానికి పెద్ద ఎత్తున తరలివస్తున్నారు.
ఫతేపుర్కు చెందిన 65 ఏళ్ల బాబురామ్ పాశ్వాన్.. నవరాత్రి సప్తమి పర్వదినాన్ని పురస్కరించుకుని జిల్లాలోని గుగౌలి గ్రామ సమీపంలోని శివభవాని మాత ఆలయానికి దర్శనం కోసం వెళ్లాడు. అమ్మవారిని దర్శించుకునే క్రమంలో బాబురామ్ తన నాలుకలోని సగభాగాన్ని కోసి అమ్మవారికి నైవేద్యంగా సమర్పించాడు. నాలుకను గాయపరుచుకున్న అనంతరం ఆ వృద్ధుడికి తీవ్రంగా రక్తస్రావం జరిగింది. ఈ ఘటనపై సమాచారం అందుకున్న కళ్యాణ్‌పూర్ పోలీసులు శివభవాని ఆలయానికి చేరుకున్నారు. అనంతరం రక్తపుమడుగులో ఉన్న వృద్ధుడిని స్థానిక ఆస్పత్రికి తరలించారు. ప్రస్తుతం బాబురామ్ ఆస్పత్రిలో చికిత్స పొందుతున్నాడని.. అతడి పరిస్థితి నిలకడగానే ఉన్నట్లు కళ్యాణ్‌పూర్ పోలీస్ స్టేషన్ ఇన్‌ఛార్జ్ నీరజ్ యాదవ్ తెలిపారు.
ఇక ఈ వార్త కాసేపటికే ఆ గ్రామ చుట్టుపక్కల వారికి వ్యాపించింది. దీంతో గ్రామస్థులు ఈ ఆలయానికి పెద్ద ఎత్తున చేరుకున్నారు. అయితే బాబురామ్ పాశ్వాన్ చాలా కాలం పాటు శివభవాని ఆలయంలో పూజారిగా ఉన్నారని గ్రామస్థులు చెబుతున్నారు.
"నవరాత్రుల సందర్భంగా ఈ ఆలయ దర్శనం కోసం భక్తులు పెద్ద సంఖ్యలో వస్తుంటారు. ఇక్కడ వివిధ రకాల విశ్వాసాలు, నమ్మకాలు మనకి కనిపిస్తుంటాయి. తమ కోరికలు నెరవేరిన తర్వాత భక్తులు శివభవాని ఆలయంలో మొక్కలు చెల్లిస్తారు. కోరిక నెరవేరినందుకు బాబురామ్ ఇలా చేసి ఉంటాడని మేము అనుకుంటున్నాము."
-- గ్రామస్థులు
మూఢనమ్మకాల మాటున ప్రాణాలు పణం..
సరిగ్గా ఇలాంటి ఘటనే గతేడాది జూన్లో మధ్యప్రదేశ్లో బడా గ్రామంలో వెలుగు చూసింది. ఓ ఆలయానికి వచ్చిన 20 ఏళ్ల యువతి అమ్మవారి ముందే తన నాలుకను తెగ్గోసుకుంది. అనంతరం నాలుక భాగాన్ని విగ్రహం పాదాల మీదకు విసిరేసింది. బడా గ్రామానికి చెందిన రాజ్కుమారీ పటేల్ అనే యువతి గురువారం తల్లిదండ్రులతో కలిసి స్థానికంగా ఉండే అమ్మవారి ఆలయానికి వచ్చింది. గుడిలో పూజ జరుగుతున్న సమయంలో ఒక్కసారిగా ఆ యువతి తన నాలుకను కోసేసుకుంది. కోసిన ఆ భాగన్ని విగ్రహం పాదాల వద్ద విసిరింది. ఈ కథనం పూర్తి వివరాల కోసం ఈ లింక్ను క్లిక్ చేయండి.
