మోదీ పర్యటనల వివరాల వెల్లడిపై హైకోర్టు స్టే

భారత వాయుసేనకు కేంద్ర సమాచార కమిషన్​(సీఐసీ) ఇచ్చిన ఆదేశాలపై దిల్లీ హైకోర్టు స్టే విధించింది. ప్రధానమంత్రి భద్రత దృష్ట్యా ఆయన విదేశీ పర్యటన వివరాలను బహిర్గతం చేయకూడదని తెలిపింది.

ప్రధానమంత్రి చేపట్టిన విదేశీ పర్యటన(స్పెషల్​ ఫ్లైట్​ రిటర్న్స్​-2) వివరాలను తెలియజేయాలని భారత వాయుసేన(ఐఏఎఫ్​)కు కేంద్ర సమాచార కమిషన్​ ఇచ్చిన ఆదేశాలపై దిల్లీ హైకోర్టు స్టే విధించింది. ఈ మేరకు జస్టిస్​ నవీన్​ చావ్లా నేతృత్వంలోని ధర్మాసనం తీర్పునిచ్చింది. అయితే.. విమానంలో ఉన్న ప్రయాణికుల సంఖ్యను చెప్పడంలో ఇబ్బంది లేదని స్పష్టంచేసింది.

ప్రధానితో పాటు పర్యటించిన మంత్రిత్వ శాఖ అధికారులు, ఇతర ప్రయాణికుల వివరాలను వెల్లడించాలని కోరుతూ సమాచార హక్కు చట్టం(ఆర్​టీఐ) కింద నౌకాదళ మాజీ అధికారి లోకేష్​ కే బాత్రా పిటిషన్​ దాఖలు చేశారు. ఆ వివరాలను దరఖాస్తుదారుడికి తెలియజేయాలని సీఐసీ గతంలో భారత వాయుసేనను ఆదేశించింది. దీనిపై దిల్లీ హైకోర్టులో ఐఏఎఫ్​ అప్పీలు దాఖలు చేసింది.