అండర్వరల్డ్ డాన్ దావూద్ ఇబ్రహీం సోదరుడు ఇక్బాల్ కస్కర్ను అరెస్టు చేశారు ముంబయి మాదక ద్రవ్యాల నియంత్రణ సంస్థ అధికారులు. డ్రగ్స్ సరఫరా కేసులో నిందితుడిని అరెస్టు చేసినట్లు తెలిపారు.
ఇటీవలే అధికారులు సీజ్ చేసిన 15 కేజీల హాషిష్ మత్తు పదార్థం సరఫరాలో.. కస్కర్ పాత్ర ఉన్నట్లు ఎన్సీబీ అధికారులు పేర్కొన్నారు. 2017లోనే దోపిడీ కేసులో థానే పోలీసులు కస్కర్ను అరెస్టు చేశారు. అయితే.. బుధవారం కస్కర్ను బల్లార్డ్ ఎస్టేట్ ఎన్సీబీ కార్యాలయానికి తరలించారు.
ఇటీవలే దావూద్ అనుచరులను కొందరిని మాదక ద్రవ్యాల సరఫరా కేసులో అరెస్టు చేశారు అధికారులు. జమ్ముకశ్మీర్ నుంచి ముంబయికి డ్రగ్స్ తరలిస్తుండగా పట్టుకున్నారు. ఈ కేసుకు సంబంధించి ఇక్బాల్ను అదుపులోకి తీసుకున్నారు. 2003లో యూఏఈ నుంచి తిరిగివచ్చినప్పటినుంచి కస్కర్.. డ్రగ్స్ దందా నడిపిస్తున్నట్లు తెలిసింది.
ఇదీ చదవండి:డ్రగ్స్ ముఠా గుట్టురట్టు- దావూద్ అనుచరుడు అరెస్ట్
