చనిపోయిన కుమార్తెలకు వారసత్వ ఆస్తిలో సమాన హక్కు : హైకోర్టు

Deceased Daughters Rights In Inherited Property : మరణించిన కుమార్తెలకు కూడా వారసత్వ ఆస్తిలో సమాన హక్కు ఉంటుందని కర్ణాటక హైకోర్టు కీలక తీర్పును వెలువరించింది. వారికి సమాన వాటా నిరాకరిచడం రాజ్యాంగ సమానత్వ సూత్రాలకు విరుద్ధం అని వ్యాఖ్యానించింది. ఈ మేరకు పిటిషనర్ దాఖలు చేసిన వ్యాజ్యాన్ని కొట్టివేసింది. ఆ వివరాలు మీ కోసం.

Deceased Daughters Rights In Inherited Property : మరణించిన కుమార్తెలకు కుడా వారసత్వ ఆస్తిలో సమాన హక్కు ఉంటుందని కర్ణాటక హైకోర్టు స్పష్టం చేసింది. వారికి వాటా నిరాకరించడం రాజ్యాంగ సమానత్వ సూత్రానికి విరుద్ధం అని వ్యాఖ్యానించింది. నారగుండాకు చెందిన చన్నబసప్ప హోస్మయి అనే వ్యక్తి దాఖలు చేసిన పిటిషన్​ను కొట్టివేసింది. ఈ మేరకు జస్టిస్ సచిన్ శంకర్ మగడం నేతత్వంలోని ధర్మాసనం తీర్పు వెలువరించింది.

హిందూ వారసత్వ చట్టం-2005 సవరణకు ముందు మరణించిన కుమార్తెలు వారసత్వ ఆస్తికి వారసులు కారని పిటిషనర్​ వాదించారు. అయితే పిటిషనర్​ వాదనను తోసిపుచ్చిన హైకోర్టు, కుమారుడు చనిపోయాక ఎలాగైతే పిత్రార్జిత ఆస్తిలో హక్కు ఉంటుందో, కుమార్తెలకు కూడా అలాగే ఉంటుందని పేర్కొంది. ఇలాంటి విషయాల్లో కుమారులు, కుమార్తెలనే వివక్ష ఉండకూడదని తేల్చి చెప్పింది. ఇలాంటి వివక్ష చూపిస్తే అది న్యాయ సంఘర్షణకు దారితీస్తుందని తెలిపింది. అందుకే కుమార్తెలకు కూడా సమాన హక్కులు కల్పించాలని ధర్మాసనం తీర్పునిచ్చింది.

"రాజ్యాంగ సమానత్వ సూత్రాలను కోర్టులు కాపాడాల్సి ఉంటుంది. లింగ వివక్ష లేకుండా అందరికీ సమాన హక్కులు కల్పించాలి. హిందూ వారసత్వ చట్టం 2005కు ముందు మరణించిన మహిళలకు సమాన హక్కులు కల్పించకపోతే, అది లింగ వివక్షతను శాశ్వతం చేస్తుంది. చట్ట సవరణల ద్వారా మహిళల హక్కులు హరించివేయలేరు"
--కర్ణాటక హైకోర్టు

ఈ క్రమంలోనే వినీతా శర్మ కేసులో సుప్రీం కోర్టు ఇచ్చిన ఆదేశాలను కూడా ధర్మాసనం ప్రస్తావించింది. చట్టంలోని సెక్షన్ 6 ప్రకారం కుమార్తెలు ఏ పరిస్థితుల్లో చనిపోయారనే విషయం గురించి పట్టించుకోవాల్సిన అవసరం లేదని నొక్కిచెప్పింది. 'పిత్రార్జిత ఆస్తిలో హక్కు పుట్టుకతో వస్తుంది. వారు జీవించి ఉన్నారా లేదా అనే అప్రస్తుతం' అని ధర్మాసనం తెలిపింది.

ఇదీ కేసు!
చన్నబసప్ప అనే వ్యక్తికి నాగవ్వ, సంగవ్వ అనే ఇద్దరు సోదరీమణులు ఉన్నారు. కొన్నాళ్ల క్రితం ఇద్దరు సోదరీమణులు చనిపోయారు. అయితే వీరిద్దరికీ తన పిత్రార్జిత ఆస్తిలో హక్కులు ఉన్నాయని నాగవ్వ, సంగవ్వ కుటుంబ సభ్యులు గడగ్ జిల్లా ప్రధాన న్యాయస్థానంలో దావా వేశారు. ఈ కేసుపై విచారణ చేపట్టిన న్యాయస్థానం తండ్రి ఆస్తిలో కుమార్తెలకు కూడా సమాన హక్కు ఉంటుందని 2023 అక్టోబర్​ 3న ఆదేశాలు జారీ చేసింది. అయితే హిందూ వారసత్వ చట్టం, 2005 సవరణకు ముందే నాగవ్వ, సంగవ్వ మరణించారు కాబట్టి వారికి ఆస్తిలో వాటా ఇవ్వడానికి వీలు లేదని, జిల్లా కోర్టు ఆదేశాలను సవాల్​ చేస్తూ చన్నబసప్ప హైకోర్టులో పిటిషన్ దాఖలు చేశాడు.