స్టాలిన్.. ఇప్పుడు దేశ ప్రజల్లో మారుమోగిపోతున్న పేరు. భాజపాకు అడ్డుకట్ట వేసేందుకు దేశంలోని విపక్షాలకు కనపడిన మరో అస్త్రం. అయితే ఇదంతా ఒక్క రోజులో వచ్చింది కాదు! దీని వెనుక ఎన్నో ఏళ్ల శ్రమ, నిరీక్షణ దాగి ఉంది. అదే ఇప్పుడు 2021 తమిళనాడు అసెంబ్లీ ఎన్నికల్లో డీఎంకేను, స్టాలిన్ను గెలిపించింది. అయితే ప్రజలు ఈ స్థాయిలో స్టాలిన్ పార్టీకి ఓట్లు వేయడానికి కారణాలేంటి? డీఎంకేను విజయ తీరాలకు చేర్చిన ఆ 'మంత్రం' ఏంటి?
నాయకత్వంతో..
10 ఏళ్లుగా ప్రతిపక్షానికే పరిమితమైన డీఎంకేకు ఈ స్థాయిలో ప్రజాదరణ లభించిందంటే.. అందుకు ముఖ్య కారణం ఆ పార్టీ అధినేత స్టాలిన్. పార్టీ అభ్యర్థుల ఎంపిక నుంచి.. ప్రచారాల వరకు, ప్రజాకర్షక హామీల నుంచి.. అధికార పార్టీపై విమర్శనాస్త్రాలను ఎక్కుపెట్టడం వరకు అన్నీ తానై చూసుకున్నారు స్టాలిన్.
"నా వారసుడు స్టాలిన్" అని బతికున్నప్పుడే కరుణానిధి ప్రకటించడం కూడా ఆయనకు కలిసివచ్చింది. పార్టీలో బలమైన నాయకత్వానికి పునాది పడింది కూడా అప్పుడే. తండ్రికి తగ్గ తనయుడిగా ఇప్పటికే మంచి పేరు తెచ్చుకున్న స్టాలిన్.. వీటిన్నిటి వల్ల మరో మెట్టు పైకి ఎక్కగలిగారు.
లోక్సభ ఎన్నికలతో మలుపు...
అయితే రాష్ట్రంలో డీఎంకే పట్టు సాధించింది మాత్రం 2019 సార్వత్రిక ఎన్నికల సమయంలోనే. 40 సీటల్లో 39 స్థానాలను వెనకేసుకున్న డీఎంకే.. అక్కడి నుంచి తిరిగి చూడలేదు. ఆ తర్వాత జరిగిన ఉపఎన్నికల్లో ఏకంగా 52శాతం ఓట్లు దక్కించుకుంది. అన్ని వేళల్లోనూ పార్టీని ముందుండి నడిపించిన నేత స్టాలినే.
మేనిఫెస్టోతో సక్సెస్!
ఈసారి ఎలాగైనా అధికారాన్ని చేపట్టాలన్న దృఢ సంకల్పంతో మేనిఫెస్టో రూపొందించింది డీఎంకే. స్టాలిన్ నేతృత్వంలోని ఈ పార్టీ విడుదల చేసిన మేనిఫెస్టో.. యావద్దేశం దృష్టిని ఆకర్షించింది. విద్య, వైద్యం, పరిశ్రమలు, వ్యవసాయం ఇలా అన్ని రంగాల్లో కలిపి 500 హామీలను ఇచ్చింది. విద్యా రుణాల మాఫీ, నీట్ రద్దు, పెట్రో ధరల తగ్గింపు, గృహిణులకు నెలకు రూ.1000 భృతి వంటివి వీటిలో ప్రత్యేకం. ఈ మేనిఫెస్టోకు ప్రజల నుంచి మంచి ఆదరణ లభించిందని ఫలితాలే సూచిస్తున్నాయి.
ఇదీ చూడండి: తమిళనాట స్టాలిన్కే జై కొట్టిన సర్వేలు!
హిందుత్వ కార్డుతో..
తమిళనాడు అసెంబ్లీ ఎన్నికల్లో ప్రత్యక్ష పోరు అన్నాడీఎంకే- డీఎంకే మధ్యే ఉన్నప్పటికీ.. రాష్ట్రంలో పట్టుసాధించాలన్న భాజపా వ్యూహాలు ఎప్పటికప్పుడు స్పష్టంగా కనపడుతూనే ఉన్నాయి. ఇందుకు తగ్గట్టుగానే అధికార పార్టీతో భాజపా బలమైన పొత్తు పెట్టుకుంది.
భాజపాను అడ్డుకోవాలంటే ప్రత్యేక చర్యలు తప్పవని అర్థం చేసుకున్న డీఎంకే.. తన రాజకీయ చరిత్రలోనే తొలిసారి గేర్ మార్చి 'హిందుత్వ' కార్డును ప్రయోగించింది. "హిందుత్వానికి డీఎంకే వ్యతిరేకం కాదు. అందరి ఆచార వ్యవహారాలను మేం గౌరవిస్తాం" అంటూ ప్రజల్లోకి స్టాలిన్ వెళ్లిన తీరు మంచి ఫలితాలను రాబట్టాయని విశ్లేషకులు చెబుతున్నారు. అటు మేనిఫెస్టోలోనూ ఇందుకు సంబంధించి ఎన్నో విషయాలను పొందుపరిచారు. స్వయంగా స్టాలిన్ భార్య.. ఎన్నికల సమయాల్లో అనేక ఆలయాలను సందర్శించి వార్తల్లో నిలిచారు.
అన్నాడీఎంకే కూడా...
ప్రజలు డీఎంకేవైపు మొగ్గు చూపేందుకు అన్నాడీఎంకే ప్రభుత్వంపై ఏర్పడిన వ్యతిరేకత, అసంతృప్తి కూడా ఓ కారణంగా తెలుస్తోంది. ముఖ్యంగా అన్నాడీఎంకేలో నాయకత్వ లేమి కనపడటం, పళనిస్వామి-పన్నీర్సెల్వం మధ్య అంతర్గత కుమ్ములాటలు వంటివి స్టాలిన్కు కలిసి వచ్చాయని రాజకీయ నిపుణులు భావిస్తున్నారు.
మరోవైపు చిన్నమ్మ శశికళ అంశం కూడా అన్నాడీఎంకేను పట్టిపీడించింది. ఆమె అభిమానుల్లో పార్టీపై వ్యతిరేకత పెరిగి, చివరికి అది డీఎంకేకు మేలు జరిగేలా చేసింది.
వీటితో పాటు కరోనా కట్టడిలో విఫలమయ్యారంటూ ప్రభుత్వంపై స్టాలిన్ ఎక్కుపెట్టిన అస్త్రాలు మంచి ఫలితాలను ఇచ్చాయి.
యువ రక్తం...
ఇక్కడ ప్రత్యేకంగా చెప్పుకోవాల్సిన విషయం ఉదయనిధి స్టాలిన్. వారసుడిని రంగంలోకి దింపిన స్టాలిన్.. యువత ఓట్లకు గాలం వేయడంలో విజయం సాధించగలిగారు. తండ్రి అడుగుజాడల్లో ముందుకు సాగి ప్రజల హృదయాల్లో తన ముద్ర వేసుకోగలిగారు ఉదయనిధి. ఇలా..ఈ తండ్రీతనయుల ద్వయం కలిసి ప్రజలను మెప్పించి, అధికారం చేజిక్కించుకుంది.
ఇదీ చూడండి: తమిళ పోరు: కౌంటింగ్కు వేళాయెరా
