Salman Khurshid on Prashant Kishor: కాంగ్రెస్ పార్టీని, రాహుల్‌ గాంధీ నాయకత్వాన్ని లక్ష్యంగా చేసుకొని ఎన్నికల వ్యూహకర్త ప్రశాంత్ కిశోర్ చేసిన వ్యాఖ్యలు.. జాతీయ రాజకీయాల్లో దుమారం రేపుతున్నాయి. విపక్ష కూటమికిగానీ, కాంగ్రెస్‌కుగానీ అధ్యక్షత వహించడం ఒక వ్యక్తికి దేవుడు ఇచ్చిన హక్కు ఏమీ కాదని, ప్రజాస్వామ్య పద్ధతిలో ప్రతిపక్ష నాయకత్వాన్ని నిర్ణయించుకోవాలని గురువారం ఆయన ట్వీట్‌ చేశారు. ప్రశాంత్ కిశోర్ వ్యాఖ్యలపై కాంగ్రెస్ నేతలు ఘాటుగా స్పందిస్తున్నారు. ప్రశాంత్ కిశోర్‌కు ప్రజాస్వామ్యం గురించి తెలియకపోతే పాఠశాలకెళ్లి చదువుకోవాలని తాజాగా.. కాంగ్రెస్ సీనియర్ నేత సల్మాన్ ఖుర్షిద్ ట్విటర్‌ వేదికగా హితవు పలికారు.
"ప్రజాస్వామ్యం పట్ల పీకే(ప్రశాంత్ కిశోర్)కి చాలా ఆసక్తి ఉన్నట్లు ఉంది. కాంగ్రెస్ కార్యకర్తల ప్రజాస్వామిక ఎంపికను ప్రశ్నించేందుకు ఆయన దైవత్వాన్ని ఉపయోగిస్తున్నారు. దీన్ని బట్టి రాజకీయాలకు సంబంధించిన పుస్తకాలు చదివి తెచ్చుకున్న జ్ఞానం మానవ ప్రవర్తనను ప్రభావితం చేయదని అర్థమవుతోంది. రాజకీయం అంటే ఎన్నికల్లో గెలవడమే మాత్రమే కాదు. ఈ విషయం వ్యాపారం చేసే వాళ్లకు ఎలా తెలుస్తుంది?"
-సల్మాన్ ఖుర్షిద్, కాంగ్రెస్ సీనియర్ నేత
