రాజ్యసభలో ప్రతిపక్ష నేతగా ఉన్న గులాం నబీ ఆజాద్ ఈనెల 15న పదవీ విరమణ చేయనున్నారు. ఈ నేపథ్యంలో కొత్త ప్రతిపక్ష నేత ఎంపికకు సిద్ధమైంది కాంగ్రెస్. తమ పార్టీ తరఫున సీనియర్ నేత మల్లికార్జున్ ఖర్గే పేరును ప్రతిపాదించింది. తమ ప్రతిపాదనను రాజ్యసభ ఛైర్మన్ వెంకయ్య నాయుడుకు సమర్పించింది.
ఆజాద్ స్థానాన్ని భర్తీ చేసేందుకు కాంగ్రెస్ ముందుగా పలువురు సీనియర్ నేతల పేర్లను పరిశీలించింది. ఆ జాబితాలో మల్లికార్జున్ ఖర్గే, ఆనంద్ శర్మ, దిగ్విజయ్ సింగ్, చిదంబరం, కపిల్ సిబల్ వంటి నేతలు ఉన్నారు. అన్ని విధాలుగా ఆలోచించి.. చివరకు మల్లికార్జున్ ఖర్గే పేరును ఖరారు చేసినట్లు పార్టీ వర్గాలు తెలిపాయి.
ముందు నుంచి ఖర్గే వైపే!
కాంగ్రెస్కు నమ్మిన బంటుగా ఉంటున్న సీనియర్ నేత మల్లికార్జున ఖర్గేకు రాజ్యసభలో ప్రధాన ప్రతిపక్షనేతగా బాధ్యతలు అప్పజెప్పే అవకాశాలు ఎక్కువగా ఉన్నాయని మొదటి నుంచి పార్టీ వర్గాలు భావించాయి. రాహుల్ గాంధీతో సాన్నిహిత్యం, దళిత నేత కావడం మొదలైన అంశాలు ఖర్గే వైపు ముగ్గు చూపేలా చేస్తాయని.. ఆయనకు పదవిని అప్పగిస్తే పార్టీకి ఉపయోగమేనని పేర్కొన్నాయి.
ఇదీ చూడండి: రాజకీయ భవితవ్యంపై ఆజాద్ కీలక వ్యాఖ్యలు
