కాంగ్రెస్ ఎక్కడకు వెళితే.. అక్కడ కుంభకోణాలకు పాల్పడుతుందని ఆరోపించారు భాజపా జాతీయ అధ్యక్షుడు జేపీ నడ్డా. అదే ఆ పార్టీ నుంచి ఆశించే అసలైన హామీ అని ఎద్దేవా చేశారు. అసోంలో మరోసారి ఎన్డీఏ కూటమే అధికారంలోకి వస్తుందని ధీమా వ్యక్తం చేశారు. కాంగ్రెస్ నేతృత్వంలోని మహాజోత్ కూటమి ఇచ్చిన ఐదు హామీలపై ఆయన విమర్శలు గుప్పించారు.
"అసోంలో అధికారంలోకి వస్తే సీఏఏను అమలు కానివ్వబోమని వాళ్లు హామీ ఇస్తున్నారు. పార్లమెంట్ చేసిన చట్టాన్ని ఒక రాష్ట్రం ఎలా మార్చగలదు? ప్రజలను వాళ్లు తప్పుదోవ పట్టిస్తున్నారు. కాంగ్రెస్కు మరో పేరు అబద్ధం. వాళ్లు ఎక్కడికి వెళితే.. అక్కడ కుంభకోణాలకు పాల్పడుతారని నేను మీకు హామీ ఇస్తున్నాను."
-జేపీ నడ్డా, భాజపా జాతీయ అధ్యక్షుడు
అసోంలోని ప్రతిపక్ష పార్టీ.. రాజకీయ పర్యటనలు చేస్తోందని నడ్డా విమర్శించారు. అసోంలో 15 ఏళ్ల పాటు అధికారంలో ఉన్న కాంగ్రెస్ ప్రభుత్వం.. తేయాకు కార్మికుల ప్రయోజనం కోసం ఏమీ చేయలేదని అన్నారు.
'మన్మోహన్ ఎందుకు చేయలేదు?'
అసోంలో ప్రధాన మంత్రి నరేంద్ర మోదీ.. 35 సార్లు పర్యటిస్తే.. మాజీ ప్రధాన మంత్రి మన్మోహన్ సింగ్ తన పదేళ్ల పదవీ కాలంలో పది సార్లు కూడా పర్యటించలేదని నడ్డా ఎద్దేవా చేశారు. గ్యాస్ సబ్సిడీ కింద రూ.8,000 కోట్లు మోదీ కేటాయించారని, మన్మోహన్ సింగ్ ఎందుకు ఆ పని చేయలేకపోయారని ప్రశ్నించారు.
అసోంలో రూ.1,100 కోట్లకు పైగా ఖర్చుతో ఎయిమ్స్ను తాము నిర్మిస్తున్నామని నడ్డా తెలిపారు. ఐదేళ్ల కాలంలో 6 వైద్య కళాశాలలను కేటాయించామని పేర్కొన్నారు.
ఇదీ చూడండి:'దీదీని ఓడించేందుకు బంగాల్ ప్రజలంతా ఏకం'
