ఏడాది కాలంగా కరోనాతో యుద్ధం చేస్తున్నాడు మనిషి. ఈ చావుబతుకల పోరాటంలో కొందరు సాటివారికి అండగా ఉంటూ అందరికీ స్ఫూర్తిగా నిలుస్తున్నారు. చిన్నాచితక పని చేసుకునే వ్యక్తులైనప్పటికీ.. ఎవరికి తోచిన మేరకు వారు సాయం అందిస్తున్న అలాంటి వ్యక్తులపై ప్రత్యేక కథనం ఇది.
కర్ణాటక హుబ్బళ్లికి చెందిన ఇర్షాద్ బల్లాషేత్ అనే వ్యక్తి కరోనా రోగులకు ఉచిత అంబులెన్స్ సేవలందిస్తూ సేవ చేస్తున్నారు. వ్యాధి బారిన పడిన వారికి సమయానికి అంబులెన్స్ అందుబాటులో లేకపోవడం తనను కలచివేసిందని చెబుతున్నారు.
హుబ్బళ్లిలోని గణేశపేటలో నివసించే ఇర్షాద్ బల్లాషేత్.. స్వయంగా అంబులెన్స్ నడుపుతూ కరోనా రోగులను ఆసుపత్రికి తీసుకెళ్తారు. కొవిడ్తో చనిపోయిన వారి మృతదేహాలను అంత్యక్రియలకు తీసుకువెళుతుంటారు. 24 గంటలూ అందుబాటులో ఉంటూ సేవ చేస్తున్న ఇర్షాద్ను స్థానికులు అభినందిస్తున్నారు.
వీడియోకాలూ ఒక సేవే..
గుజరాత్లో ఎన్నడూ లేనంతగా కరోనా కేసులు పెరుగుతున్న నేపథ్యంలో నవ్సారి జిల్లా ఆసుపత్రికి రోగుల తాకిడి పెరిగింది. ఇక్కడికి వచ్చేవారిలో చాలామంది నిరుపేదలే. స్మార్ట్ఫోన్ సదుపాయం లేని వీరు.. ఆసుపత్రిలో చేరిన తమవారి బాగోగులు తెలుసుకునేందుకు హెల్ప్లైన్ నంబరుకు ఫోన్ చేయాల్సిందే.
ఇక తమ కుటుంబ సభ్యులతో మాట్లాడలేని రోగులు సైతం మానసికంగా నిరాశకు గురవుతుంటారు. ఈ సమస్యను గమనించిన కొందరు యువ వలంటీర్లు కొవిడ్ రోగులతో వారి కుటుంబ సభ్యులకు వీడియో కాల్ చేయిస్తూ.. సేవకు కాదేదీ అనర్హం అని చాటుతున్నారు. పీపీఈ కిట్లు ధరించి కొవిడ్ రోగులను సందర్శిస్తూ గ్రామాల్లో ఉన్న తమవారికి వీడియో కాల్ చేసుకునే సదుపాయం కల్పిస్తున్నారు.
నీటిపై తేలియాడే అంబులెన్స్..
జమ్ముకశ్మీర్ శ్రీనగర్లో పడవ నడుపుకుని జీవనం సాగించే తారిక్ అహ్మద్ పత్లూ అనే వ్యక్తి తన బోట్నే అంబులెన్స్గా మార్చేశారు. గతేడాది తాను మహమ్మారి బారిన పడిన సమయంలో సహాయం చేసేందుకు ఎవరూ ముందుకు రాలేదని.. తన పరిస్థితి మరొకరికి రాకుండా ఉండేందుకే ఇలా చేసినట్లు చెబుతున్నారు.
దీనిలో ఒక బెడ్తో పాటు.. స్ట్రెచర్, ప్రథమ చికిత్స కిట్ అమర్చినట్లు చెప్పారు తారిక్. కొద్దిరోజుల్లో ఆక్సిజన్ సిలిండర్నూ ఏర్పాటు చేస్తానని తెలిపారు.
70ఏళ్ల వృద్ధుడి ఔదార్యం..
తాను పొదుపు చేసుకున్న రూ.2.5 లక్షలను కొవిడ్ చికిత్సలో కీలకమైన వెంటిలేటర్ కొనుగోలు చేసేందుకు వెచ్చించారు 70 ఏళ్ల విశ్రాంత ఉపాధ్యాయుడు. ఆక్సిజన్ కొరతతో తీవ్ర ఇబ్బందులు ఎదుర్కొంటున్న రోగులకు తన వంతుగా ఇలా సహాయం చేసినట్లు తెలిపారు ఛత్తీస్‌గఢ్ బెమెతరా జిల్లాలోని బెర్లాకు చెందిన పుస్రం సిన్హా అనే వ్యక్తి.
"నేను నా జీవితాన్ని ఆనందంగా గడిపాను. ప్రాణాపాయంలో ఉన్న వ్యక్తిని కాపాడటం చాలా ముఖ్యం. నా ఈ ప్రయత్నం కనీసం కొందరి ప్రాణాలనయినా కాపాడగలదని నమ్ముతున్నా. అందుకే బెర్లాలోని ప్రభుత్వ ఆస్పత్రికి ఈ వెంటిలేటర్ ఇచ్చా" అని సిన్హా తెలిపారు.
ఇవీ చదవండి: ప్రాణాలు కాపాడే 'బ్రీత్ బ్యాంక్'.. ఎక్కడంటే!
