Rice or Roti Which is Better for Diabetes: ప్రస్తుతం కాలంలో చిన్నా పెద్దా తేడా లేకుండా దాదాపు అందరిని మధుమేహం సమస్య వేధిస్తోంది. అయితే, క్రమశిక్షణతో కూడిన జీవనవిధానం, శరీర అవసరాలకు తగ్గ పోషకాహారం, తగిన వ్యాయామం చేయడం వల్ల మధుమేహం వ్యాధి బారినపడకుండా కాపాడుకోవచ్చని నిపుణులు సలహా ఇస్తున్నారు. ఈ క్రమంలోనే చాలా మంది అన్నానికి బదులుగా చపాతీలు తింటుంటారు. ఇలా తినడం వల్ల డయాబెటిస్ అదుపులో ఉంటుందని భావిస్తుంటారు. అసలు నిజంగానే షుగర్ సమస్య ఉన్నవారు అన్నానికి బదులుగా చపాతీలు తింటే మేలు చేస్తుందా? అన్న ప్రశ్నకు ప్రముఖ పోషకాహార నిపుణులు డాక్టర్ జానకీ శ్రీనాథ్ వివరించారు.
"మధుమేహం రోగులు తప్పనిసరిగా తమకంటూ ప్రత్యేకమైన ఆహారపట్టికను పాటించాలి. రక్తంలో చక్కెర నిల్వల్ని అదుపు చేసుకోవాలంటే ముందు ఎత్తుకు తగ్గ బరువున్నారో లేదో చెక్ చేసుకోవాలి. ఒకవేళ అంతకు తక్కువ ఉంటే.. సాధారణ స్థాయికి పెరగాలి.. ఎక్కువ ఉంటే తగ్గడానికి ప్రయత్నించాలి. అలానే మీరు రోజంతా ఎలాంటి శారరీక శ్రమ చేస్తారు? అందుకు ఎంత మేర శక్తి అవసరం అవుతుందన్న విషయాలను కెలొరీల్లో నిర్ధరించుకుని ఆ మేరకు ఆహార రూపంలో తీసుకోవాలి. షుగర్ రోగులు వేసుకునే ట్యాబెట్లు, ఇన్సులిన్‌ డోసు అందరికీ ఒకలా ఉండవు."
--డాక్టర్ జానకీ శ్రీనాథ్, పోషకాహార నిపుణులు
ఏది తినాలి?
రక్తంలో చక్కెర స్థాయుల నియంత్రణకు అన్నం, చపాతీల్లో ఏది తిన్నా పెద్దగా తేడా ఏమీ ఉండదని పోషకాహార నిపుణులు డాక్టర్ జానకీ శ్రీనాథ్ తెలిపారు. శరీరానికి అవసరమైన శక్తికి తగ్గట్లు ఆ పూటకి సరిపడా కెలొరీలు తీసుకుంటున్నామో లేదో చూసుకుంటే సరిపోతుందని వివరించారు. మొదటి నుంచీ ఉన్న మీ ఆహారపు అలవాట్లకు భిన్నంగా ఏదీ బలవంతంగా తినాల్సిన అవసరం లేదని వెల్లడించారు. అయితే, అన్నం కూడా ఎంత మోతాదు తింటున్నామో గమనించుకోవాలని సూచిస్తున్నారు. చపాతీలను లెక్కకు మించి తిన్నా, బాగా రావాలని ఎక్కువ ప్రాసెసింగ్‌ చేసిన గోధుమపిండి వాడినా కూడా ఫలితం ఉండదని పేర్కొన్నారు.
అయితే, బియ్యంలోనూ లో గ్లైసమిక్‌ రకాలెన్నో ఉన్నాయని.. వాటిని ఎంచుకోవచ్చని సలహా ఇస్తున్నారు. అన్నం, చపాతీలు ఏం తిన్నా సరే.. వీటితోపాటు ఆకుకూరలు, వెజిటబుల్‌ సలాడ్, పీచు ఉండే పదార్థాలు, తగిన ప్రొటీన్‌ వంటివి తీసుకోవాలని చెబుతున్నారు. ఇవి తినడం వల్ల గ్లూకోజ్‌ నెమ్మదిగా విడుదలై ఆకలి తగ్గుతుందని అంటున్నారు. ఒకవైపు శరీరానికి సరిపడా పోషకాహారం తీసుకుంటూనే శారీరక శ్రమ తప్పక చేయాలని.. ఫలితంగా కండశాతం పెరిగి బ్లడ్‌ షుగర్ హెచ్చుతగ్గుల్ని తట్టుకునే శక్తి వస్తుందంటున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
రోజుకు ఎన్ని లీటర్ల నీళ్లు తాగాలి? వాటర్ ఎక్కువగా తాగితే ఈ సమస్యలు వస్తాయట తెలుసా?
పిక్కలు పట్టేసి ఇబ్బంది పడుతున్నారా? ఈ చిన్న టిప్స్ పాటిస్తే హాయిగా నిద్రపోతారు!
