ఐఎన్ఎక్స్ మీడియా కేసులో కేంద్ర మాజీ మంత్రి పి.చిదంబరంపై ఎన్ఫోర్స్మెంట్ డైరెక్టరేట్(ఈడీ) దాఖలు చేసిన అభియోగపత్రంలో పలు కీలక వివరాలను పొందుపర్చింది. తన కుమారుడు కార్తీ వ్యాపార ప్రయోజనాల కోసం సాయం చేయాల్సిందిగా ఐఎన్ఎక్స్ మీడియా ప్రమోటర్లకు చిదంబరం సూచించారని పేర్కొంది. చిదంబరంపై ఈడీ అభియోగాల్లో ఇదే అత్యంత కీలకమైన అంశమని తెలిపింది.
కీలక ఆధారాలతో ఈడీ..
కార్తీ చిదంబరం తన అడ్వాంటేజ్ స్ట్రేటజిక్ కన్సల్టింగ్ ప్రైవేట్ లిమిటెడ్(ఏఎస్సీపీఎల్) సంస్థ కోసం సాయం చేయాల్సిందిగా తన తండ్రిని సంప్రదించినట్లుగా ఈడీ తెలిపింది. కార్తీ వద్ద నుంచి స్వాధీనం చేసుకున్న డిజిటల్ పరికరాలు, ఈమెయిల్స్ విశ్లేషణ ద్వారా ఈ విషయం వెల్లడైందని చెప్పింది. కార్తీ దగ్గర పనిచేసే అకౌంటెంట్ ఎస్.ఎస్ భాస్కరన్ కూడా ఈ వ్యవహారంలో జోక్యం చేసుకున్నట్లు పేర్కొంది.
ఈ కేసులో ఈడీ దాఖలు చేసిన అభియోగపత్రాన్ని దిల్లీ ప్రత్యేక న్యాయస్థానం పరిగణనలోకి తీసుకుంది. నిందితులు ఏప్రిల్ 7న కోర్టు ముందు హాజరు కావాలని సమన్లు జారీ చేసింది.
ఇంతకీ ఐఎన్ఎక్స్ కేసు ఏంటి?
చిదంబరం కేంద్ర ఆర్థిక మంత్రిగా ఉన్నప్పుడు.. ఐఎన్ఎక్స్ మీడియాకు విదేశీ పెట్టుబడుల ప్రోత్సాహక బోర్డు అనుమతులు ఇవ్వడంలో అవకతవకలకు పాల్పడినట్లు 2017 మే 15న సీబీఐ కేసు నమోదు చేసింది. ఈ కేసు ఆధారంగా ఎన్ఫోర్స్మెంట్ డైరెక్టరేట్ మనీలాండరింగ్ కేసు పెట్టింది. 2018 ఆగస్టు 21న కస్టడీలోకి తీసుకుంది సీబీఐ, అనంతరం అక్టోబర్ 16న ఈడీ అదుపులోకి తీసుకుంది. ఈడీ కేసులో డిసెంబర్ 4, 2019న ఆయనకు బెయిల్ మంజూరు అయింది.
ఇదీ చూడండి:ఐఎన్ఎక్స్ కేసు: చిదంబరంపై ఆరోపణలు ఏంటి?
