వారిద్దరికీ విడిగా వివాహాలు అయ్యాయి. చుట్టాలు కావడం వల్ల తరచూ ఒకరింటికి ఒకరు వెళ్తుంటారు. అలా వారి మధ్య చిగురించిన ప్రేమ.. పోలీసులను ముప్పుతిప్పలు పెడుతోంది. ఈ సమస్యను పరిష్కరించలేక తలలు పట్టుకుంటున్నారు. ఈ వింత ఘటన ఛత్తీస్గఢ్లో జరిగింది.
ఇంతకీ ఏం జరిగిందంటే.. జీవన్లాల్ పానికా అనే వ్యక్తి తన కుటంబంతో కలిసి మార్వాయి పోలీస్ స్టేషన్ పరిధిలోని చార్చేది అనే గ్రామంలో నివాసం ఉంటున్నాడు. అతడికి భార్య ఫూల్కున్వర్తో పాటు నలుగురు పిల్లలు ఉన్నారు. అతడి బంధువులైన రాజేంద్ర ప్రసాద్ పానికా భార్య రాఖీ పూరితో పాటు పెంద్రా అనే గ్రామంలో నివసిస్తున్నాడు. తరచూ జీవన్లాల్, రాజేంద్ర ప్రసాద్ కుటుంబాలు ఒకరింటికి ఒకరు వెళ్తుండేవి.
ఈ క్రమంలో రాజేంద్ర ప్రసాద్ భార్య రాఖీపూరి, జీవన్లాల్ మధ్య పరిచయం ఏర్పడి ప్రేమగా మారింది. వారిద్దరూ అదును చూసుకుని ఇల్లు విడిచి వెళ్లిపోయారు. ఆరు రోజుల తర్వాత రాఖీ పూరి బంధువులు.. జీవన్లాల్ ఇంటికి వెళ్లారు. వీరందరినీ రాజేంద్ర ప్రసాద్ తన ఇంటికి తీసుకెళ్లాడు. అక్కడికి రాఖీ-జీవన్ జంట తిరిగి వచ్చింది.
పోలీస్ స్టేషన్కు చేరిన పంచాయితీ..
రాఖీపూరి భర్త రాజేంద్ర ప్రసాద్, ప్రేమికుడు జీవన్ లాల్ మధ్య పెద్ద గొడవ జరిగింది. వారు పరస్పరం పోలీస్ స్టేషన్లో కేసులు పెట్టుకున్నారు. మరోవైపు, భర్త వద్దకు వెళ్లాలని లేదని.. అతడు తనను వేధిస్తున్నాడని.. రాఖీపూరి పోలీస్ స్టేషన్లో ఫిర్యాదు చేసింది. మరోవైపు, తమపై దాడి చేశాడని జీవన్ లాల్ తల్లి రాజేంద్ర ప్రసాద్పై పోలీస్ స్టేషన్లో కేసు పెట్టింది.
నేను అతడి వద్దకు వెళ్లను.. భర్తపై కేసు..
తన లవర్ జీవన్లాల్ లేకుండా తాను బతకలేనని రాఖీపూరి చెప్పింది. కాగా, తన భార్య రాఖీపూరి లేకుండా తాను బతకలేనని రాజేంద్ర ప్రసాద్ అంటున్నాడు. మరోవైపు, తన భర్త మరో మహిళను తీసుకొచ్చినా తనకు ఏం అభ్యంతరం లేదని.. ఆమెతో నేను సంతోషంగానే ఉంటానని జీవన్లాల్ భార్య అంటోంది. దీంతో వింత లవ్స్టోరీని ఎలా పరిష్కరించాలో తెలియక పోలీసులు తలలు పట్టుకుంటున్నారు.
'ప్రస్తుతం రాఖీపూరిని తన తల్లిదండ్రులకు అప్పగించాం. ఆమె బంధువులందరినీ ఒప్పించే ప్రయత్నం చేస్తున్నాం. రాఖీపూరి తన భర్తపై చేసిన ఆరోపణలపై కూడా దర్యాప్తు చేస్తున్నాం. ఆ మహిళ మేజర్. కాబట్టి ఆమె తన భర్తతో బలవంతంగా ఉండాల్సిన అవసరం లేదు.' అని పోలీసులు చెప్పుకొచ్చారు.
