దిల్లీ ప్రైవేటు ఆసుపత్రుల తనిఖీకి 10 బృందాలు

దిల్లీలో కరోనా రోగులకు ప్రైవేటు ఆసుపత్రులు చికిత్స అందిస్తున్న విధానాన్ని పరిశీలించేందుకు 10 బృందాలను ఏర్పాటు చేసింది కేంద్రం. ఈ మల్టీ- డిసిప్లీనరీ బృందాలు.. ఆసుపత్రులను సందర్శించి రెండురోజుల్లో నివేదికను సమర్పించనున్నాయి.

దిల్లీలో కరోనా రోగులకు ప్రైవేటు ఆసుపత్రులు.. చికిత్స అందిస్తున్న తీరును పరిశీలించేందుకు 10 బృందాలను ఏర్పాటు చేసింది కేంద్రం. దిల్లీ ప్రభుత్వం, కేంద్రం జారీ చేసిన మార్గదర్శకాలకు అనుగుణంగా ఆయా ఆసుపత్రులు చర్యలు చేపడుతున్నాయా? లేదా? అన్న విషయాన్ని ఈ మల్టీ-డిసిప్లీనరీ బృందాలు తనిఖీలు చేస్తాయి.

కేంద్ర హోంశాఖ ఆదేశాల ప్రకారం.. ఈ మల్టీ-డిసిప్లీనరీ బృందాలు ప్రైవేటు ఆసుపత్రులను తక్షణమే సందర్శిస్తాయి. రెండు రోజుల్లో రిపోర్టును కేంద్రానికి అందిస్తాయి.

దిల్లీలో పెరుగుతున్న కరోనా కేసుల నేపథ్యంలో ఆదివారం కేంద్ర హోంమంత్రి అమిత్​ షా.. ఉన్నతస్థాయి సమావేశాన్ని నిర్వహించారు. ఈ భేటీలోనే డిసిప్లీనరీ బృందాలను ఏర్పాటు చేయాలన్న నిర్ణయాన్ని తీసుకున్నారు. మరో బృందాన్ని అదనంగా ఏర్పాటు చేసి రిజర్వులో పెట్టారు.

ఈ బృందాలు మొత్తం 114 ప్రైవేటు ఆసుపత్రులను సందర్శించి కరోనా రోగుల చికిత్సపై రిపోర్టును అందించనున్నాయి. కరోనా డాష్​బోర్డుల్లో ఐసీయూ బెడ్ల అందుబాటుకు సంబంధించిన వివరాలను వెల్లడించడం, కొవిడ్​-19 డిశ్ఛార్జ్​ విధానాలను పాటించడం, ఆర్​టీ-పీసీఆర్​ పరీక్షల నిర్వహణ తదితర ప్రభుత్వ మార్గదర్శకాల అమలును ఈ బృందాలు పరిశీలించనున్నాయి.

ఇదీ చూడండి:- దిల్లీలో ఒక్క రోజే 1400 చలాన్లు జారీ