కేరళలో జికా వైరస్ కేసులు వెలుగు చూసిన నేపథ్యంలో కేంద్ర ప్రభుత్వం అప్రమత్తమైంది. పరిస్థితి చేయి దాటిపోకుండా చూసేందుకు చర్యలు చేపట్టింది. ఇందుకోసం ఆరుగురు సభ్యులున్న నిపుణుల బృందాన్ని కేరళకు పంపింది.
"ప్రజా ఆరోగ్య నిపుణులు, వ్యాధి నిపుణులు, ఎయిమ్స్కు చెందిన వైద్యులు ఉన్న ఆరుగురు సభ్యులున్న బృందం కేరళకు బయలుదేరింది. అక్కడి పరిస్థితిని పర్యవేక్షిచడం సహా వైరస్ కేసుల నిర్వహణలో రాష్ట్ర ప్రభుత్వానికి వీరు సహకరించనున్నారు."
-లవ్ ఆగర్వాల్, కేంద్ర ఆరోగ్య శాఖ సంయుక్త కార్యదర్శి
జికా వైరస్ తొలి కేసు తిరువనంతపురంలోని పరస్సాలలో నమోదైంది. ఓ 24 ఏళ్ల గర్భిణికి వైద్యులు గురువారం పరీక్షలు నిర్వహించగా ఆమెకు ఈ వైరస్ సోకినట్లు వెల్లడైంది. ఈ నెల 7న ఆమె ఓ బిడ్డకు జన్మనిచ్చింది. బిడ్డలో వైరస్ లక్షణాలు లేనందున వైద్యులు ఊపిరి పీల్చుకున్నారు.
ఆ ఆసుపత్రిలోని 19 మంది సిబ్బందికి పరీక్షలు నిర్వహించగా.. 14 మందికి వైరస్ సోకినట్లు నిర్ధరణ అయింది. జ్వరం, దద్దుర్లు, తలనొప్పి, ఒళ్లునొప్పులు జికా వైరస్ లక్షణాలని వైద్యులు వెల్లడించారు. ఈ వైరస్కు మందు లేకపోవడం ఆందోళన కలిగించే విషయం.
స్పెషల్ యాక్షన్ ప్లాన్...
జికా వ్యాప్తిని నియంత్రించడానికి ప్రత్యేక కార్యాచరణ ప్రణాళికను రూపొందించినట్లు కేరళ రాష్ట్ర ఆరోగ్య శాఖ మంత్రి వీణా జార్జ్ తెలిపారు. ఇందులో భాగంగా.. నమూనాలను పరీక్షించేందుకు ఓ అత్యవసర విభాగాన్ని ఏర్పాటు చేసినట్లు చెప్పారు. గర్భిణులకు ఈ వైరస్ ముప్పు ఎక్కువగా పొంచి ఉన్న నేపథ్యంలో... లక్షణాలు ఉన్నవారు పరీక్షలు చేయించుకోవాలని ఆమె కోరారు.
ఇదీ చూడండి: 'లామ్డా' వేరియంట్పై కేంద్రం కీలక ప్రకటన
ఇదీ చూడండి: Kappa Variant: ఆ రాష్ట్రంలో కప్పా వేరియంట్ కలకలం!
