Camel Milk Tea: కొవిడ్ మహమ్మారి ప్రభావంతో ప్రజలలో ఆరోగ్యంపై అవగాహన పెరిగింది. తీసుకునే ప్రతి పదార్థంలో ఆరోగ్య ప్రయోజనాలు ఉండేలా జాగ్రత్త పడుతున్నారు . ఇదే విషయాన్ని గ్రహించిన మణికందన్.. క్యామెల్ టీని అందుబాటులోకి తీసుకొచ్చారు. ఒంటె పాలతో వ్యాపారం మొదలుపెట్టారు. ఎన్నో ఆరోగ్య ప్రయోజనాలు ఉండే ఈ పాలు.. ఇమ్యూనిటీని పెంచడమే కాక షుగర్ వంటి దీర్ఘకాలిక వ్యాధులకు చెక్ పెట్టడంలో కీలక పాత్ర పోషిస్తుందని అంటున్నారు. దక్షిణాదిన క్యామెల్ టీ అందుబాటులోకి రావడం ఇదే తొలిసారని చెప్పుకొచ్చారు.
తమిళనాడులోని కోయంబత్తూరు జిల్లా నీలాంబర్ ప్రాంతానికి చెందిన మణికందన్.. ఇటీవల కొవిడ్ బారిన పడ్డారు. మహమ్మారి నుంచి కోలుకుంటున్న క్రమంలో ఆయనకు ఒంటె పాల వల్ల కలిగే లాభాల గురించి తెలిసింది. దీంతో ఒంటె పాల వ్యాపారాన్ని ప్రారంభించాలనుకున్న మణికందన్.. ప్రభుత్వం అనుమతితో సంగమిత్ర పేరున క్యామెల్ మిల్క్ ఫార్మ్ ఏర్పాటు చేశారు. లీటరు పాలను రూ.450కు విక్రయిస్తున్నారు. అంతేకాదు.. ఈ ఫార్మ్లో ఒంటె పాలతో చేసే టీ, కాఫీ, రోస్మిల్క్ వంటి ఉత్పత్తులకు కూడా మంచి డిమాండ్ ఉంది. కప్పు క్యామెల్ టీని 30 రూపాయలకు అమ్ముతున్నారు.
క్యామెల్ మిల్క్కు మంచి గిరాకీ లభిస్తోందంటున్నారు మణికందన్. ఇది డయాబెటిస్ను కంట్రోల్ చేస్తుందని చెప్పడానికి తన వద్ద ఆధారాలు కూడా ఉన్నాయని పేర్కొన్నారు. మరోవైపు.. మణికందన్ ఈ ప్రాంతాన్ని కేవలం క్యామెల్ ఫార్మ్కు పరిమితం చేయలేదు. వినియోగదారులను ఆకట్టుకునేందుకు గుర్రపు స్వారీని కూడా అందుబాటులోకి తెచ్చారు. కస్టమర్లు తమ క్యామెల్ టీ, కాఫీలు తాగి.. గుర్రపు స్వారీ చేస్తూ సేద తీరుతుంటారని చెప్పుకొచ్చారు మణికందన్.
ఇదీ చూడండి : లక్ అంటే ఈ పిల్లవాడిదే.. బస్సు చక్రాల కింద పడినా..
