అవినీతి కేసులో దేశ్​ముఖ్​పై సీబీఐ ఎఫ్ఐఆర్

మహారాష్ట్ర మాజీ హోంమంత్రి అనిల్ దేశ్​ముఖ్​పై ఎఫ్ఐఆర్ నమోదు చేసింది సీబీఐ. మరికొందరి పేర్లనూ ఎఫ్ఐఆర్​లో చేర్చింది. అనంతరం, దేశ్​ముఖ్​కు సంబంధించిన పలు ప్రాంతాల్లో సోదాలు నిర్వహించింది.

అవినీతి ఆరోపణల కేసులో మహారాష్ట్ర మాజీ హోంమంత్రి అనిల్ దేశ్​ముఖ్​పై సీబీఐ కేసు నమోదు చేసింది. ముంబయిలోని పలు ప్రాంతాల్లో సోదాలు నిర్వహించింది.

నెలకు రూ.100 కోట్లు వసూలు చేయాలని పోలీసులకు దేశ్​ముఖ్ ఆదేశాలు జారీ చేశారని ముంబయి మాజీ కమిషనర్ పరమ్​బీర్ సింగ్ చేసిన ఆరోపణలపై సీబీఐ దర్యాప్తు చేస్తోంది. బాంబే హైకోర్టు ఆదేశాల మేరకు ప్రాథమిక దర్యాప్తు ప్రారంభించింది.

విచారణలో భాగంగా.. దేశ్​ముఖ్​పై అధికారికంగా దర్యాప్తు చేసేందుకు తగిన ఆధారాలు లభించాలని అధికారులు చెప్పారు. దేశ్​ముఖ్​పై రెగ్యులర్ కేసు నమోదు చేయడం సహా, మరికొందరిపై అవినీతి నిరోధక చట్టం కింద ఎఫ్ఐఆర్ దాఖలు చేసినట్లు వివరించారు. కేసు నమోదు తర్వాత దేశ్​ముఖ్​కు చెందిన పలు ప్రాంతాల్లో తనిఖీలు చేపట్టినట్లు తెలిపారు.

సోదాలు..

ఇందులో భాగంగా నాగ్​పుర్​లోని దేశ్​ముఖ్ నివాసాన్నీ సీబీఐ అధికారులు సోదా చేశారు. దేశ్​ముఖ్ ప్రాతినిధ్యం వహిస్తున్న కతోల్ నియోజకవర్గాన్ని అధికారులు సందర్శించే అవకాశం ఉంది.

బార్లు, రెస్టారెంట్ల నుంచి ప్రతి నెల రూ.100కోట్లు వసూలు చేయాలని పోలీసు అధికారులపై దేశ్‌ముఖ్‌ ఒత్తిడి తెచ్చినట్లు ముంబయి మాజీ సీపీ పరంబీర్‌ సింగ్‌ ఆరోపించారు. ఈ ఆరోపణలపై ప్రాథమిక విచారణ జరపాలని సీబీఐని బాంబే హైకోర్టు ఆదేశించింది. ఈ కేసుపై మహారాష్ట్ర సర్కారు, అనిల్‌ దేశ్‌ముఖ్‌ సుప్రీంకోర్టును ఆశ్రయించగా.. అక్కడ వారికి చుక్కెదురైంది. సీబీఐ విచారణ అవసరమేనని సుప్రీం అభిప్రాయపడింది.

ఇదీ చదవండి- సీజేఐగా జస్టిస్ ఎన్.వి.రమణ ప్రమాణం