నూతన ఐటీ రూల్స్-2021లోని క్లాజ్ 9(1), 9(3) నిబంధనల వల్ల భావ ప్రకటన స్వేచ్ఛకు ఆటంకం కలిగే అవకాశం ఉందని బాంబే హైకోర్టు అభిప్రాయపడింది. ఈ మేరకు వీటి అమలుపై మధ్యంతర స్టే విధిస్తూ నిర్ణయం తీసుకుంది. డిజిటల్ మాధ్యమాలు 'కోడ్ ఆఫ్ ఎథిక్స్' (నైతిక నియమావళి)ని కచ్చితంగా అనుసరించాలని సూచించడం రాజ్యాంగంలోని ఆర్టికల్ 19కి వ్యతిరేకమేనని పేర్కొంది. ఈ అంశంపై బాంబే హైకోర్టు ప్రధాన న్యాయమూర్తి జస్టిస్ దీపాంకర్ దత్తా, జస్టిస్ జీఎస్ కులకర్ణిల ధర్మాసనం విచారణ చేపట్టింది.
విచారణలో భాగంగా.. నూతన ఐటీ నిబంధనలు 2009-ఐటీ యాక్ట్లోని క్లాజ్ 9 పరిధిని సైతం ఉల్లఘింస్తున్నట్లు ధర్మాసనం పేర్కొంది. ది లీఫ్లెట్ అనే లీగల్ న్యూస్ పోర్టల్తో పాటు.. నిఖిల్ వాగ్లే అనే జర్నలిస్ట్ నూతన ఐటీ నిబంధనలను సవాలు చేస్తూ బాంబే హైకోర్టులో పిటిషన్లు దాఖలు చేశారు.
ఇక ఐటీ నిబంధనల్లోని 14, 16 నియమాలపై స్టే ఇచ్చేందుకు ధర్మాసనం నిరాకరించింది. ఈ అంశంపై అప్పీల్ చేసేందుకు అవకాశం ఇవ్వాలన్న కేంద్రం అభ్యర్థననూ హైకోర్టు తిరస్కరించింది.
కొత్త ఐటీ నిబంధనలు..
సామాజిక మాధ్యమాలు సహా ఇతర డిజిటల్ ప్లాట్ఫామ్స్ కొత్తగా చీఫ్ కంపైలెన్స్ ఆఫీసర్, నోడల్, రెసిడెంట్ గ్రీవెన్స్ అధికారులను నియమించాలి. ఈ ముగ్గురు అధికారులు భారత్ నుంచే కార్యకలాపాలు జరపాలి. అభ్యంతరకర పోస్టులపైనా వారు తీసుకున్న చర్యల గురించి ప్రతి నెలా కేంద్రానికి నివేదిక అందించాలి.
ఈ మార్గదర్శకాలను ఫిబ్రవరిలోనే విడుదల చేసింది కేంద్రం. 50లక్షలు లేదా అంతకన్నా ఎక్కువ వినియోగదారులు ఉన్న సామాజిక మాధ్యమాలకు ఈ నిబంధనలు వర్తిస్తాయని తెలిపింది. వీటిని అమలు చేసేందుకు మే 25ను తుది గడువుగా ఉంచింది.
ఇవీ చదవండి:
