అదో కరవు ప్రాంతం. పంటలు పండక రైతులు ఇతర ప్రాంతాలకు వలస వెళ్తుంటారు. పరిశ్రమలు కూడా లేకపోవడం వల్ల చాలా మంది యువకులు పని కోసం ఇతర రాష్ట్రాలకు వెళ్తారు. కానీ, ఆ ప్రాంతంలోని ఓ గ్రామం పరిస్థితి భిన్నం. ఆ ఊళ్లోని యువకులు రూ.లక్షల్లో సంపాదిస్తున్నారు. సాంకేతికత అండతో స్వయం ఉపాధి పొందుతున్నారు. వారే మహారాష్ట్ర బీడ్ జిల్లాలోని కోల్గావ్ గ్రామం యువకులు. వారి విజయ గాథ ఇదే.
కోల్గావ్ గ్రామానికి చెందిన అక్షయ్ కుమార్.. తాను స్వయం ఉపాధి పొంది.. నెలకు రూ.10 లక్షల వరకు సంపాదిస్తున్నాడు. మిగతా యువకులకు కూడా దారి చూపిస్తున్నాడు. గంతలో అక్షయ్ కూడా పనిలేక ఇబ్బంది పడ్డాడు. 2009-10 సమయంలో ఓ యూట్యూబ్ ఛానల్ ప్రారంభించాడు. ఆ తర్వాత బ్లాగింగ్ మెదలుపెట్టాడు. మొదట్లో ఇంటర్నెట్ సమస్యలతో చాలా ఇబ్బంది పడ్డాడు అక్షయ్. ఇంటర్నెట్ సిగ్నల్ కోసం ఊరు బయటకు వెళ్లాల్సి వచ్చేది. కానీ జియో నెట్వర్క్ వచ్చిన తర్వాత.. వెనుదిరిగి చూసుకోలేదు. అలా చదువుకుని ఉపాధి లేక ఇబ్బంది పడుతున్న యువకులందరినీ ఒక్క చోటుకు చేర్చి.. యూట్యూబ్, బ్లాగింగ్, ఇంటర్నెట్కు సంబంధించిన మెలకువలు నేర్పించాడు. ప్రస్తుతం ఆ గ్రామంలో 300 నుంచి 400 యువకులు యూట్యూబ్ ఛానల్స్ ద్వారా ఉపాధి పొంది రూ.లక్షల్లో సంపాదిస్తున్నారు. కాగా, ప్రతి జిల్లాలో ఇలాంటి కార్యాలయాలు ప్రారంభించి.. యువతకు ఉపాధి కల్పించాలని అనుకుంటున్నట్లు అక్షయ్ కుమార్ తెలిపాడు.
'నేను ఇంతకుముందు నెట్ పరీక్ష కోసం సన్నద్ధం అయ్యేవాడిని. కానీ లాక్డౌన్ తర్వాత సొంతూరికి తిరిగి వచ్చాను. అప్పుడు అక్షయ్ కుమార్తో కలిసి.. పనిచేయడం మొదలుపెట్టాను. ప్రస్తుతం నాకు నెలకు రూ.1-2 లక్షల ఆదాయం వస్తోంది. ఒక ల్యాప్టాప్, ఐఫోన్ కొనుక్కున్నాను. కొంత భూమి కూడా తీసుకున్నాను. ఇళ్లు కట్టిస్తున్నాను. యువకులు ఇంటర్నెట్ డేటాను సరైన రీతిలో ఉపయోగించాలి.'
--ఆదిత్య పాటిల్, ఉపాధి పొందిన యువకుడు
'అక్షయ్ కుమార్ నా క్లాస్మేట్. నేను అతడు చేసే పని చూశాను. ఊళ్లో చదువుకున్న యువకులంతా అతడిలా పనిచేయాలి. అప్పుడే మన ఉపాధి మనమే సృష్టించుకుని.. మంచి ఆదాయం పొందగలం.'
--సకరాం దుబాలే, స్థానికుడు
ఇలా వచ్చింది ఆలోచన..
ఇలా చేయాలనే ఆలోచన తనకు ఎలా వచ్చిందో వివరించాడు అక్షయ్ కుమార్. 'గత కొన్నేళ్లుగా చాలా మంది టిక్టాక్, పబ్జీ లాంటి గేమ్స్కు అడిక్ట్ అవుతున్నారు. దాని వల్ల వారి సమయం వృథా అవుతుందే.. కానీ, ఏ మాత్రం ప్రయోజనం ఉండదు. దానివల్ల చాలా సైడ్ ఎఫెక్టులు ఉంటాయి. పబ్జీ గేమ్ వల్ల చాలా మంది యువకులు అత్మహత్యలు కూడా చేసుకున్నారు. దానికి పరిష్కారంగానే నేను మరో మార్గం చూపించాను. అందులో భాగంగానే ఇప్పటివరకు 6 యూట్యూబ్ ఛానళ్లు, 48 నుంచి 50 వెబ్సైట్లు రూపొందించి.. యువతకు ఉపాధి కల్పించాను. అందులో 12 వెబ్సైట్లు నేను సొంతంగా నిర్వహిస్తున్నాను. వీటిపై నెలకు దాదాపు రూ. 30 లక్షల (30-40 వేల డాలర్లు) వరకు ఆదాయం వస్తోంది. ఆ ఆదాయంలో 40 శాతం నేను తీసుకుని.. మిగతా మొత్తం యువకులకు ఇస్తాను' అని అక్షయ్ కుమార్ చెప్పుకొచ్చాడు.
