Beaten to death: దేశ రాజధాని దిల్లీలో దారుణ ఘటన వెలుగు చూసింది. అగ్గిపెట్టె ఇవ్వలేదన్న కోపంతో ఓ వ్యక్తిని తీవ్రంగా కొట్టారు కొందరు దుండగులు. దీంతో అతను ప్రాణాలు కోల్పోయాడు. ఈ సంఘటన తైముర్ నగర్ ప్రాంతంలో సోమవారం రాత్రి జరిగింది. మృతుడు బిహార్లోని పూర్ణియా జిల్లా ధంగమా గ్రామానికి చెందిన దేవన్ రిషిగా (35) పోలీసులు గుర్తించారు.
ఇదీ జరిగింది..
జిల్లాలోని జసోలా గ్రామంలో తన భార్య రూపా దేవి, నలుగురు పిల్లలు అనిల్, భీమ్, పంకజ్,దులారీతో కలిసి నివాసం ఉంటున్నాడు దేవన్ రిషి. కూలీ పనులు చేసుకుంటూ జీవనం సాగిస్తున్నాడు.
తైముర్ నగర్లో నివాసం ఉంటున్న తన సోదరుడిని కలిసేందుకు సోమవారం రాత్రి 7.30 గంటల ప్రాంతంలో పయనమయ్యాడు దేవన్. మద్యం మత్తులో ఉన్న 3-4 మంది దుండగులు ఇంద్ర క్యాంప్ సమీపంలో దేవన్ను అడ్డగించారు. అగ్గిపెట్టె ఇవ్వాలని డిమాండ్ చేశారు. తన వద్ద లేదని వారితో చెప్పాడు దేవన్. దీంతో ఆగ్రహించిన దుండగులు.. దేవన్పై దాడికి దిగారు. అతని అరుపులు విన్న స్థానికులు అక్కడికి చేరుకోవటం వల్ల నిందితులు పారిపోయారు. తీవ్రంగా గాయపడిన దేవన్ను స్థానిక ఆసుపత్రికి తరలించారు. చికిత్స పొందుతూ మంగళవారం ఉదయం ప్రాణాలు కోల్పోయాడు దేవన్.
మృతుడి సోదరుడు ఇచ్చిన సమాచారం మేరకు ఇద్దరు మైనర్లను అదుపులోకి తీసుకున్నారు పోలీసులు. కేసు నమోదు చేసుకొని దర్యాప్తు చేపట్టారు.
గతంలోనూ ఇలాంటి ఘటనలు జరిగాయని స్థానికులు ఫిర్యాదు చేశారు. ఇటీవలే రూపేశ్ అనే యువకుడిపై తన పిల్లల ముందే కాల్పులు జరపగా అక్కడికక్కడే ప్రాణాలు కోల్పోవటం ఆ ప్రాంతంలో భయబ్రాంతులకు గురి చేసింది.
ఇదీ చూడండి: పసికందు సహా ఒకే కుటుంబంలో ఐదుగురు సజీవ దహనం
