ఉత్తర్ప్రదేశ్లోని హత్రాస్లో ఇటీవల సామూహిక అత్యాచారానికి గురైన ఓ దళిత యువతి మృతిచెందింది. 19ఏళ్ల ఆమె దిల్లీలోని ఆస్పత్రిలో చికిత్స పొందుతూ మంగళవారం ఉదయం 3గంటలకు మరణించినట్టు హత్రాస్ ఎస్పీ విక్రాంత్ వీర్ తెలిపారు.
ఇదీ జరిగింది..
సెప్టెంబర్ 14న యూపీలో దళిత యువతిపై నలుగురు దుండగులు అత్యాచారానికి పాల్పడ్డారు. అనంతరం గొంతుకోసి హతమార్చేందుకు ప్రయత్నించారు. ఈ ఘటనలో ఆమెకు తీవ్ర గాయాలయ్యాయి. దీంతో బాధితురాలిని తొలుత యూపీ అలీగఢ్లోని జవహర్లాల్ నెహ్రూ వైద్య కళాశాల ఆస్పత్రిలో చేర్పించారు. ఆ తర్వాత మెరుగైన చికిత్స కోసం దిల్లీలోని సఫ్దార్ జంగ్ ఆస్పత్రికి తరలించారు.
ఈ ఘటనకు కారణమైన నలుగురు నిందితులను ఇప్పటికే అరెస్ట్ చేశారు పోలీసులు.
మహిళల భద్రతకు మీరే బాధ్యులు: ప్రియాంక
ఈ ఘటనపై స్పందిస్తూ యూపీ ప్రభుత్వంపై విమర్శల దాడి చేశారు కాంగ్రెస్ ప్రధాన కార్యదర్శి ప్రియాంకా గాంధీ. రాష్ట్రంలో మహిళల భద్రతకు సీఎందే బాధ్యత అని యోగి ఆదిత్యనాథ్ను ఉద్దేశించి ట్వీట్ చేశారు.
హత్రాస్, షాజహన్పుర్, గోరఖ్పుర్లో జరిగిన వరుస అత్యాచార ఘటనలు రాష్ట్రాన్ని కదిలించాయన్నారు ప్రియాంక. రాష్ట్రంలో శాంతి భద్రతలు మరింత క్షీణించాయన్న ఆమె.. మహిళలకు రక్షణ కరవైందని ఆరోపించారు. హత్రాస్ ఘటన నిందితులను కఠినంగా శిక్షించాలని డిమాండ్ చేశారు.
ఇదీ చదవండి: కదులుతున్న బస్సులో మహిళపై అత్యాచారం.. కట్టుకథేనా?
