కరోనా వైరస్ ఒకరి నుంచి మరొకరికి సోకుతూ.. యావత్ ప్రపంచాన్ని చుట్టేసింది. ఈ మహమ్మారి వ్యాప్తిని అరికట్టే విషయంలో కాంటాక్ట్ ట్రేసింగ్ కీలక పాత్ర పోషిస్తుంది. అయితే.. అసలు ఈ కాంటాక్ట్ ట్రేసింగ్ అంటే ఏంటి? అది ఏవిధంగా పని చేస్తుంది అనేది తెలుసుకుందాం.
కరోనా వచ్చినప్పటి నుంచి అందరూ భౌతిక దూరం పాటిస్తున్నారు. కారణం వైరస్ ఒకరి నుంచి మరొకరికి సంక్రమించకుండా ఉండడం కోసం. ఇదే విధంగా ఒక వ్యక్తికి పాజిటివ్గా నిర్ధరణ అయిన తరువాత అతని కుటుంబ సభ్యులను, సన్నిహితంగా ఉన్నవారిని గుర్తించి ఐసోలేషన్కు తరలిస్తారు. ఇలా చేయడాన్నే కాంటాక్ట్ ట్రేసింగ్ అంటారు. ఈ విధంగా చేయడం వల్ల వైరస్ను కట్టడి చేయొచ్చు.
కొవిడ్ బాధితుల్ని కలిసిన వారిని అప్రమత్తం చేయడం కాంటాక్ట్ ట్రేసింగ్ లక్ష్యం. తద్వారా ఇతరులకు వ్యాపించకుండా నిరోధించవచ్చు. కరోనా మహమ్మారిని కట్టడి చేయటం, ఆర్థిక కార్యకలాపాలను సురక్షితంగా తిరిగి ప్రారంభించేందుకు కాంటాక్ట్ ట్రేసింగ్ కీలక పాత్ర పోషిస్తుందని పేర్కొంటున్నారు ఆరోగ్య నిపుణులు. కానీ ఇది అంత సులభమైన విషయం కాదని అభిప్రాయపడుతున్నారు.
ఒక్కోచోట ఒక్కోలా..
కాంటాక్ట్ ట్రేసింగ్ ప్రపంచవ్యాప్తంగా వివిధ రకాలుగా జరుగుతోంది. దీనిలో ఉన్న ప్రధాన సమస్య ఏంటంటే... పాజిటివ్గా నిర్ధరణ అయిన వ్యక్తి వివిధ ప్రదేశాల్లో తిరిగి ఉండొచ్చు. ఈ క్రమంలో ఆ వ్యక్తి చుట్టూ ఎవరున్నారో, అతను ఎవరెవర్ని కలిశాడో ఒక అంచనాకు రావడం చాలా కష్టతరం. ఈ నేపథ్యంలో సదరు వ్యక్తి సంచరించిన ప్రదేశాలను తిరిగి ప్రారంభించడం సాహసంగా పరిగణించవచ్చు.
అమెరికాలో అయితే అక్కడి స్థానిక ఆరోగ్య విభాగాలు వైరస్ సోకిన వ్యక్తితో సన్నిహితంగా మెలిగిన వారిని గుర్తించి సమాచారం ఇస్తాయి. వీలైతే పిలిచి చెప్పడం కూడా జరుగుతోంది. దీనికి స్పందించే వారు ఉన్నట్టే.. నిర్లక్ష్యం చేసేవారూ లేకపోలేదు.
ఇదీ చూడండి: వైరల్: వృద్ధురాలి అంత్యక్రియల్లో వానరాల ఓదార్పు
