బంగాల్​లో శాంతి నెలకొల్పుదాం: గవర్నర్ త్రిపాఠి

పశ్చిమబెంగాల్​లో శాంతి భద్రతల పునరుద్ధరణపై చర్చించేందుకు ఆ రాష్ట్ర గవర్నర్​ కేసరినాథ్​ త్రిపాఠి నేడు అఖిలపక్ష సమావేశం నిర్వహించనున్నారు. సార్వత్రిక ఎన్నికల అనంతరం రాష్ట్రంలో చెలరేగిన హింసాకాండను చల్లార్చడానికి ప్రయత్నాలు ప్రారంభించారు.

సార్వత్రిక ఎన్నికల అనంతరం పశ్చిమబెంగాల్​లో జరుగుతున్న హత్యలకు నిరసనగా ఆ రాష్ట్ర భాజపా కోల్​కతాలో చేపట్టిన ప్రదర్శన తీవ్ర ఉద్రిక్తతలకు దారితీసింది. ప్రదర్శనగా వెళ్తున్న భాజపా శ్రేణులను పోలీసులు అడ్డుకున్నారు. దీనిని భాజపా కార్యకర్తలు ప్రతిఘటించడం వల్ల పోలీసులు లాఠీఛార్జ్​ జరిపారు. బాష్పవాయువు, జల ఫిరంగులు ప్రయోగింంచారు.

ఈ ఘటనలో భాజపా సీనియర్ నేతలు ముకుల్​రాయ్​, రాష్ట్ర పార్టీ ప్రధాన కార్యదర్శి రాజు బెనర్జీ సహా పలువురు గాయపడ్డారు. దీనిపై బంగాల్​ రాష్ట్ర భాజపా వ్యవహారాల ఇన్​ఛార్జ్​ కైలాస్ విజయవర్గీయ, రాష్ట్ర పార్టీ అధ్యక్షుడు దిలీప్​ ఘోస్​ రోడ్డుపైన బైఠాయించారు. తరువాత తమ నిరసనను విరమించారు. పోలీసులు తమపై దౌర్జన్యానికి పాల్పడ్డారని ఆరోపించారు.

రాష్ట్రంలో ఎన్​సీఎస్​సీ పర్యటన..

ఉత్తర 24 పరగణాల జిల్లా సందేశ్​బలిలో జాతీయ షెడ్యూల్​ కులాల కమిషన్​ (ఎన్​సీఎస్​సీ) సభ్యులు శుక్రవారం పర్యటించనున్నారు. గత శనివారం తృణమూల్, భాజపా కార్యకర్తల మధ్య జరిగిన ఘర్షణలో షెడ్యూల్ కులాలకు చెందిన ముగ్గురు వ్యక్తులు హత్యకు గురయ్యారు. ఐదుగురు సభ్యులు గల ఎన్​సీఎస్​సీ బృందం ఈ బాధితుల ఇళ్లకు వెళ్లి వివరాలు సేకరిస్తుందని కమిషన్​ పేర్కొంది.

అఖిలపక్ష నేతలతో నేడు గవర్నర్​ భేటీ...

రాష్ట్రం​లో శాంతి భద్రతల పునరుద్ధరణపై చర్చించేందుకు బంగాల్​ గవర్నర్ కేసరినాథ్​ త్రిపాఠి గురువారం సాయంత్రం 4 గంటలకు అఖిలపక్ష సమావేశం నిర్వహించనున్నారు. ఈ భేటీకి తృణమూల్​ కాంగ్రెస్​, భాజపా, సీపీఎం, కాంగ్రెస్ నేతలను ఆహ్వానించారు.

ఇదీ చూడండి: శాంతి సూచి జాబితాలో భారత్@141