ఆధునిక సాంకేతికతను వినియోగించడంలో ఉగ్రవాదులు ఆరితేరారు. పుల్వామా దాడిపై దర్యాప్తు చేపట్టిన అధికారులకు నమ్మలేని నిజాలు తెలుస్తున్నాయి. పుల్వామా ఉగ్రదాడి కోసం అత్యాధునిక వర్చువల్ సిమ్లను వినియోగించారని వెల్లడైంది. ఈ సిమ్ల సమాచారాన్ని ఛేదించడానికి అమెరికా సాయాన్ని కోరింది భారత్.
పుల్వామా ఘటన తర్వాత త్రాల్‌తో సహా ఇతర చోట్ల జరిగిన ఎన్‌కౌంటర్‌ ప్రదేశాలను దర్యాప్తు సంస్థలు పరిశీలించాయి. దొరికిన ఆధారాల బట్టి చూస్తే పుల్వామా దాడికి పాల్పడిన ఆదిల్‌ దార్‌ దాడి చేసేంత వరకు సూత్రధారి ముదసిర్‌ ఖాన్‌తో సంభాషించినట్లు అధికారులు చెప్పారు.
వర్చవల్‌ సిమ్‌లో ఎలా ...
వర్చువల్ సిమ్ సర్వీస్ ప్రొవైడర్లు అమెరికాలో ఉంటారు. కంప్యూటర్ ఆధారిత ఫోన్ నెంబర్‌ను సృష్టిస్తారు. దీనిని వినియోగించేందుకు ఫోన్లో సర్వీసు ప్రొవైడర్‌ అప్లికేషన్‌ ఉండాలి. సోషల్‌ మీడియా ఖాతాలతో అనుసంధానం చేసుకోవాలి. దీని నెంబర్లు ‘+1’తో ప్రారంభమవుతాయి. ఇలాంటి నెంబర్లను వాడటం కోసం వినియోగించే దే 'మొబైల్‌ స్టేషన్‌ ఇంటర్నెషనల్‌ సబ్‌స్క్రైబర్‌ డైరెక్టరీ' (ఎంఎస్‌ఐఎస్‌డీఎన్‌).
వర్చువల్ సిమ్ల వివరాలు, వాటికి సర్వీస్ అందించిన సంస్థలు, ఇంటర్నెట్ ప్రోటోకాల్ అడ్రస్లు అందించాలని అమెరికాను కోరింది భారత్.
ముంబయి దాడుల్లోనూ...
26/11 ముంబయి దాడుల సమయంలోనూ వర్చువల్ సిమ్లను ఉపయోగించారని అధికారులు గుర్తించారు. సిమ్ కోసం తప్పుడు వివరాలను పెట్టి 229 డాలర్లను వెస్ట్రన్‌ మనీ ట్రాన్స్‌ఫర్‌ ద్వారా కాల్ఫోనెక్స్‌కు పంపించినట్లు అధికారులు గుర్తించారు. ఈ డబ్బు ఇటలీలోని మదీన ట్రేడింగ్‌ సంస్థ ద్వారా పీవోకేలోని జావెద్‌ ఇక్బాల్ ఖాతాకు వెళ్లినట్లు తెలిసింది.
అనంతరం 2009లో ఇద్దరు పాకిస్థానీలను ఇటలీ పోలీసులు అరెస్టు చేశారు. కాల్ఫోనెక్స్ సంస్థ ఇక్బాల్ కోసం 300 సార్లు నగదు లావాదేవీలను జరిపినట్లు తేలింది. కానీ ఇక్బాల్ ఒక్కసారి కూడా ఇటలీలో అడుగు పెట్టిన సందర్భం లేదు.
ఇదీ చూడండీ: ఉగ్రవాదానికి దారులు మూసేస్తోన్న సర్కారు!
