రామజన్మభూమిపై సుప్రీంకోర్టు తీర్పును విజయంగా భావిస్తూ సంబరాలు చేసుకోనున్నట్లు విశ్వహిందూ పరిషత్ తెలిపింది. ఈ మేరకు దేశవ్యాప్తంగా సుమారు 200 ప్రాంతాల్లో.. మార్చి 25 నుంచి ఏప్రిల్ 25 వరకు అతిపెద్ద రథయాత్రను చేపట్టనున్నట్లు వీహెచ్పీ ప్రధాన కార్యదర్శి మిలింద్ పరాండె స్పష్టం చేశారు.
గతేడాది నవంబరులో అయోధ్య రామమందిర నిర్మాణానికి ఓ ట్రస్టు ఏర్పాటు చేయాలని సుప్రీం కోర్టు తీర్పునిచ్చింది. మరో ప్రాంతంలో మసీదు కోసం సున్నీ వక్ఫ్ బోర్డుకు 5 ఎకరాల స్థలాన్ని కేటాయించాలని కేంద్రానికి ఆదేశాలు జారీ చేసింది. ఈ నేపథ్యంలో ఆలయ నిర్మాణం కోసం ఫిబ్రవరిలో 15మంది సభ్యులతో ట్రస్టును ఏర్పాటు చేసింది కేంద్రం.
కరోనాతో అప్రమత్తం
ప్రస్తుతం కరోనా వైరస్ వ్యాపిస్తున్న నేపథ్యంలో ఆరోగ్యపరంగా అన్ని జాగ్రత్తలు తీసుకున్న తర్వాతే కార్యక్రమాన్ని ముందుకు తీసుకెళ్తామని విశ్వహిందూ పరిషత్ వివరించింది.
సీఏఏ అల్లర్లపై..
కేంద్రం తీసుకొచ్చిన పౌరసత్వ సవరణ చట్టం(సీఏఏ) ఎంతో మంచి నిర్ణయమని పేర్కొంది. దీని వల్ల ముస్లింలపై ఎలాంటి ప్రభావం పడదని ఉద్ఘాటించింది.
