కాంగ్రెస్ అధ్యక్షుడు రాహుల్ గాంధీకి ఊహించని షాక్ తగిలింది. దశాబ్దాలుగా గాంధీ-నెహ్రూ కుటుంబానికి పట్టం కడుతూ వచ్చిన అమేఠీ ఓటర్లు.. ఈసారి కమలానికి జై కొట్టారు. మోదీ సర్కారుతోనే అభివృద్ధి సాధ్యమన్న ప్రచారాన్ని విశ్వసించిన అమేఠీ ప్రజానీకం కాషాయానికి పట్టం కట్టారు. భాజపా అభ్యర్థిగా స్మృతి ఇరానీని గెలిపించి.. కాంగ్రెస్ జాతీయ అధ్యక్షుడికే ఊహించని తీర్పు చెప్పారు.
తరుచూ పర్యటనలతో..
రాహుల్ అందుబాటులో ఉండరని ప్రజల్లోకి విస్తృతంగా తీసుకెళ్లిన స్మృతి ఇరానీ... గత ఎన్నికల్లో ఓటమిపాలైనా తాను నియోజకవర్గ ప్రజలకు అందుబాటులో ఉన్నానంటూ మద్దతు కూడగట్టారు. 2014 ఎన్నికల్లో రాహుల్ గాంధీపై పోటీ చేసిన ఆమె లక్ష ఓట్ల తేడాతో ఓటమి చవిచూశారు. అనంతరం కేబినెట్ మంత్రిగా పనిచేస్తూనే అమేఠీలో తరచూ పర్యటిస్తూ అక్కడి ప్రజల మనసులు గెలుచుకున్నారు.
కాంగ్రెస్పై వ్యతిరేకత...
దశాబ్దాలుగా గాంధీ కుటుంబం ప్రాతినిధ్యం వహిస్తున్న అమేఠీలో కాంగ్రెస్ ప్రభ నానాటికీ దిగజారడం స్మృతి విజయానికి తోడ్పడిందని చెప్పాలి. నియోజకవర్గ అభివృద్ధికి, స్థానిక సమస్యల పరిష్కారానికి కాంగ్రెస్ పెద్దగా ప్రాధాన్యం ఇవ్వలేదనే వాదన వ్యతిరేకతకు కారణమైంది. ఎంపీగా ఎన్నికైన రాహుల్ గాంధీ.. ప్రజలకు అందుబాటులో ఉండలేకపోవటం, అధ్యక్షుడి హోదాలో ఇతర అంశాలకు ప్రాధాన్యమిస్తూ నియోజకవర్గాన్ని విస్మరించారనే భావన... అమేఠీ ప్రజల్లో నెలకొనడమే రాహుల్ ఓటమికి దారితీసింది.
1967 నుంచి కాంగ్రెస్కు కంచుకోట..
గాంధీ-నెహ్రూ కుటుంబానికి 1967 నుంచి అమేఠీ ప్రజలు పట్టం కడుతూ వచ్చారు. 2 సార్లు మాత్రమే కాంగ్రెసేతర పార్టీలు ఇక్కడ విజయం సాధించాయి. అత్యవసర పరిస్థితి అనంతరం జరిగిన 1977ఎన్నికల్లో జనతాపార్టీ అభ్యర్థి రవీంద్రప్రతాప్‌ సింగ్‌ కాంగ్రెస్ అభ్యర్థి సంజయ్‌ గాంధీపై 75 వేల ఓట్ల మెజారిటీతో గెలిచారు. 1998లో బీజేపీ అభ్యర్థి సంజయ్‌ సింగ్‌.. కాంగ్రెస్ అభ్యర్థి సతీశ్‌ శర్మపై 23 వేల ఓట్ల తేడాతో నెగ్గారు. తాజా ఎన్నికల్లో భాజపా అభ్యర్థి స్మృతి ఇరానీ విజయఢంకా మోగించారు. 1967 తర్వాత అమేఠీ నుంచి గెలిచిన 3వ కాంగ్రెసేతర అభ్యర్థిగా రికార్డు సృష్టించారు.
తొలి సారి ఓటమి..
2004లో అమేఠీ నుంచి ఎన్నికల బరిలో నిలిచి రాజకీయ అరంగేట్రం చేసిన రాహుల్ గాంధీ అప్పటి నుంచి వరుసగా గెలుస్తూ వచ్చారు. తొలి ఎన్నికల్లో 3 లక్షల 90 వేల ఓట్ల ఆధిక్యం సాధించారు. 2009 ఎన్నికల్లో 4 లక్షల 64 వేల ఓట్ల మెజారిటీ సాధించారు. దేశవ్యాప్తంగా మోదీ పవనాలు వీచిన 2014 ఎన్నికల్లో గెలిచినా లక్షా 7 వేల ఓట్ల ఆధిక్యానికి పరిమితమయ్యారు. ఈసారి ఓటమి పాలయ్యారు.
ఇదీ చూడండి: చాయ్వాలానే కాదు... చౌకీదారూ గెలిచారు
