17వ లోక్సభ ఏర్పాటయ్యాక మొదటి సారి సభలో గందరగోళ పరిస్థితి తలెత్తింది. ఇందుకు కారణం పుదుచ్చేరి గవర్నర్ కిరణ్ బేడీ చేసిన ట్వీట్పై డీఎంకే ఎంపీలు అభ్యంతరం వ్యక్తం చేయటమే. ట్వీట్పై ఆగ్రహం వ్యక్తం చేసిన డీఎంకే ఎంపీలు వెల్లోకి వెళ్లి నిరసన తెలిపారు.
శూన్యగంటలో ప్రశ్నోత్తరాలలో భాగంగా కిరణ్ బేడీ ట్వీట్పై అభ్యంతరం వ్యక్తంచేశారు డీఎంకే ఎంపీ టీఆర్ బాలు. శూన్యగంటలో ఇలాంటి ఫిర్యాదులను స్వీకరించలేమని సభాపతి ఓం బిర్లా స్పష్టం చేశారు. రాజ్యాంగ పదవిలో ఉన్నవారిపై లిఖితపూర్వక ఫిర్యాదు చేయాలని సభాపతి సూచించారు.
అయినప్పటికీ వెనక్కు తగ్గని బాలు.. వెల్లోకి వెళ్లి నినాదాలు చేశారు. డీఎంకే ఎంపీలందరితో పాటు ఆప్ ఎంపీ భగవత్ మాన్ ఆయనను అనుసరించారు. డీఎంకే నేతల నిరసనపై స్పందించిన పార్లమెంట్ వ్యవహారాల శాఖ మంత్రి ప్రహ్లాద్ జోషి.. తీర్మానం పెట్టాల్సిందిగా చెప్పారు. అదే సమయంలో రక్షణ మంత్రి రాజ్నాథ్ సింగ్ తీర్మానం పెడితే చర్చకు వస్తామని ప్రకటించారు.
సభాపతి చురకలు
శూన్యగంటలో భాగంగా బంగాల్ తృణమూల్, భాజపా ఎంపీల మధ్య మాటల యుద్ధం సాగింది. ఎంపీలను శాంత పరిచేందుకు.. "లోక్సభను బంగాల్ విధాన సభలా మార్చకండి" అంటూ వ్యంగ్యంగా స్పందించారు సభాపతి.
ఇదీ చూడండి: రాహుల్ నిష్క్రమణ... కాంగ్రెస్కు కొత్త అధ్యక్షుడు!
