ఉత్తరాఖండ్ విపత్తులో 197 మంది వరకు గల్లంతయ్యారని, వారి కోసం సహాయక చర్యలు ముమ్మరంగా సాగుతున్నాయని కేంద్ర హోంమంత్రి అమిత్ షా రాజ్యసభలో ప్రకటించారు. ఎన్టీపీసీ ప్రాజెక్ట్కు సంబంధించిన ఓ సొరంగంలో 25-35 మంది వరకు చిక్కుకున్నట్లు సమాచారం ఉందన్నారు. వారిని కాపాడేందుకు ప్రయత్నిస్తున్నట్లు వెల్లడించారు.
"ఉత్తరాఖండ్లో సంభవించిన పెనువిపత్తులో గల్లంతైన 197 మంది కోసం గాలిస్తున్నాం. ప్రస్తుతం నిర్మాణంలో ఉన్న ఎన్టీపీసీ ప్రాజెక్ట్లో 139 మంది, రిషి గంగా ప్రాజెక్ట్ వద్ద 46 మంది కార్మికులు గల్లంతైనట్లు సమాచారం. మరో 12 మంది స్థానికులని అధికారులు గుర్తించారు. వీరి కోసం సహాయక సిబ్బంది ముమ్మరంగా గాలిస్తున్నారు.
450 మంది ఐటీబీపీ జవాన్లు, 5 బృందాల ఎన్డీఆర్ఎఫ్, 8 బృందాల ఆర్మీ జవాన్లు, ఒక నౌకాదళ బృందం, 5 ఐఏఎఫ్ హెలికాప్టర్లు సహాయక చర్యల్లో నిమగ్నమయ్యాయి. ప్రస్తుతం నీటి మట్టం తగ్గిందని, దిగువ ప్రాంతాల్లో వరద ముప్పు తొలిగిపోయిందని ఉత్తరాఖండ్ ప్రభుత్వం ప్రకటించింది. చాలా ప్రాంతాల్లో విద్యుత్తు సరఫరా పునరుద్ధరణ జరిగింది. ధ్వంసమైన 5 వంతెనలకు బీఆర్ఓ మరమ్మతులు చేస్తోంది."
- అమిత్ షా, కేంద్ర హోంమంత్రి
2020-21 వార్షిక సంవత్సరంలో రూ.1041 కోట్లు.. విపత్తు నిర్వహణ సహాయం కింద ఉత్తరాఖండ్కు కేటాయించినట్లు అమిత్ షా ప్రకటించారు. ఇందులో తొలి దఫాగా రూ.468 కోట్లు ఇప్పటికే రాష్ట్రానికి విడుదల చేసినట్లు తెలిపారు.
రాజ్యసభ సంతాపం
ఉత్తరాఖండ్ విలయంలో ప్రాణాలు కోల్పోయిన వారిక ఆత్మలకు శాంతి చేకూరాలని రాజ్యసభ సభ్యులు కాసేపు మౌనం పాటించారు.
ఇదీ చూడండి: ఉత్తరాఖండ్ జలప్రళయం: 31కి చేరిన మృతులు
