సుక్మా ఎదురుకాల్పుల్లో నిన్న గల్లంతైన 17 మంది జవాన్ల మృతదేహాలను నేడు గుర్తించారు అధికారులు.
"నిన్నటి ఎదురు కాల్పుల్లో 17 మంది జవాన్లు గల్లంతయ్యారు. వారిని వెతికేందుకు సెర్చ్ ఆపరేషన్ చేపట్టాం. నేడు అడువిలో ఆ 17 మంది మృతదేహాలను గుర్తించింది సెర్చ్ టీం."
-సుందర్ రాజ్, బస్తర్ ఐజీ
ఆకస్మిక దాడి..
ఎల్మాగుండాలో నక్సల్ శిబిరాలు ఉన్నట్లు సమాచారం అందుకున్న సీఆర్పీఎఫ్.. శనివారం ఆపరేషన్ చేపట్టింది. ఇందుకోసం జిల్లా రిజర్వ్ గార్డ్(డీఆర్జీ), స్పెషల్ టాస్క్ ఫోర్స్(ఎస్టీఎఫ్), కమాండో బెటాలియన్ ఫర్ రిసొల్యూట్ యాక్షన్(కోబ్రా) బృందాల నుంచి దాదాపు 600 జవాన్లను మోహరించింది.
మిన్పా గ్రామ శివార్లలో పెట్రోలింగ్ నిర్వహిస్తున్న సైనిక బృందాలను సుమారు 250 మంది నక్సలైట్లు చుట్టుముట్టారు. ఆయుధాలతో దాడికి పాల్పడ్డారు. మావోలకు దీటుగా పోలీసులు బదులిచ్చారు.
రెండున్నర గంటల పాటు కొనసాగిన ఎదురుకాల్పుల్లో.. 15 మంది జవాన్లు తీవ్రంగా గాయపడ్డారు. 17 మంది గల్లంతయ్యారు. క్షతగాత్రులను హెలికాప్టర్ల ద్వారా రాయపుర్ ఆసుపత్రికి తరలించారు. వీరిలో ఇద్దరి పరిస్థితి విషమంగా ఉందని ఐజీ సుందరరాజ్ తెలిపారు.
గల్లంతైన వారి కోసం అనేక గంటలపాటు వెతికారు భద్రతా సిబ్బంది. చివరకు 17 మంది మృతదేహాలను గుర్తించారు.
ఇదీ చదవండి:దిల్లీ నుంచి గల్లీ వరకు.. అన్నీ బంద్
