సార్వత్రిక ఎన్నికలు చివరి అంకానికి చేరుకుంటున్నాయి. ఇప్పటికే ఐదు దశల పోలింగ్ ముగిసింది. ఆదివారం ఆరో విడత పోలింగ్కు ఎన్నికల సంఘం అన్ని ఏర్పాట్లు చేస్తోంది. శాంతియుత వాతావరణంలో ఓటింగ్ జరిగేలా చర్యలు తీసుకుంటోంది.
ఆరో దశలో భాగంగా 7 రాష్ట్రాల్లోని 59 లోక్సభ స్థానాలకు ఆదివారం పోలింగ్ జరగనుంది. ఎన్నికలను సజావుగా నిర్వహించేందుకు లక్షా 13 వేల పోలింగ్ కేంద్రాలను ఈసీ ఏర్పాటు చేసింది. ఉత్తర్ప్రదేశ్లో 14, బిహార్లో 8, హరియాణాలో 10, ఝార్ఖండ్లో 4, మధ్యప్రదేశ్లో 8, బంగాల్లో 8, దిల్లీలో 7 లోక్సభ స్థానాలకు ఓటింగ్ జరగనుంది. 979 మంది అభ్యర్థుల భవితవ్యాన్ని 10 కోట్ల 17 లక్షల మంది ఓటర్లు ఈవీఎంలలో నిక్షిప్తం చేయనున్నారు.
ఉత్తరప్రదేశ్లో హోరాహోరీ...
ఉత్తరప్రదేశ్లోని 14 లోక్సభ స్థానాలకు పోలింగ్ జరగనుంది. ప్రధానంగా భాజపా- ఎస్పీ, బీఎస్పీ, ఆర్ఎల్డీ కూటమి మధ్య పోరు నెలకొంది.
సమాజ్‌వాదీ పార్టీ అధ్యక్షుడు, యూపీ మాజీ ముఖ్యమంత్రి అఖిలేశ్‌యాదవ్‌ అజంగఢ్‌ నుంచి బరిలో ఉన్నారు. 2014లో ఇక్కడి నుంచి అఖిలేశ్‌ తండ్రి ములాయం సింగ్‌ యాదవ్‌ విజయం సాధించారు.
కేంద్ర మంత్రి మేనకా గాంధీ సుల్తాన్‌పూర్‌ నుంచి పోటీ చేస్తున్నారు.
ఆదివారం ఉత్తరప్రదేశ్లో ఎన్నికలు జరగనున్న 14 నియోజకవర్గాల్లో 2014లో భాజపా 13 చోట్ల నెగ్గింది.
మధ్యప్రదేశ్లో నువ్వా-నేనా..
మధ్యప్రదేశ్‌లోని 8 నియోజకవర్గాల్లో పోలింగ్ జరగనుంది. కాంగ్రెస్, భాజపా మధ్య నువ్వానేనా అనే రీతిలో పోటీ నెలకొంది.
రాజధాని భోపాల్‌లో కాంగ్రెస్ సీనియర్‌ నేత దిగ్విజయ్‌ సింగ్‌, ఇటీవల భాజపాలో చేరిన మాలేగావ్‌ పేలుళ్ల కేసు నిందితురాలు సాధ్వి ప్రజ్ఞా సింగ్‌ ఠాకూర్‌ మధ్య రసవత్తర పోటీ నెలకొంది.
కాంగ్రెస్ కంచుకోట గుణ నియోజకవర్గం నుంచి ఆ పార్టీ కీలక నేత జ్యోతిరాదిత్య సింధియా పోటీ చేస్తున్నారు. మోరేనా లోక్సభ స్థానం నుంచి కేంద్ర మంత్రి నరేంద్రసింగ్‌ థోమర్‌ బరిలో ఉన్నారు.
దిల్లీ పోరు త్రిముఖం...
దేశ రాజధాని దిల్లీ పరిధిలోని 7 లోక్సభ నియోజకవర్గాల్లో పోలింగ్ జరగనుంది. ఇక్కడ భాజపా, ఆమ్‌ఆద్మీ, కాంగ్రెస్ పార్టీ మధ్య ముక్కోణపు పోరు నెలకొంది. కమల దళాన్ని ఓడించేందుకు ఆప్‌, కాంగ్రెస్ పొత్తు పెట్టుకునేందుకు యత్నించినప్పటికీ కార్యరూపం దాల్చలేదు.
దిల్లీ మాజీ ముఖ్యమంత్రి, కాంగ్రెస్ సీనియర్‌ నేత షీలా దీక్షిత్‌, బాక్సింగ్‌లో ఒలింపిక్‌ పతక విజేత విజేందర్‌ సింగ్‌, కేంద్ర మంత్రి హర్షవర్ధన్‌, మాజీ క్రికెటర్‌ గౌతమ్‌ గంభీర్‌ వంటి ప్రముఖులు ఈసారి అదృష్టాన్ని పరీక్షించుకుంటున్నారు.
బంగాల్లో పటిష్ఠ భద్రత...
బంగాల్లో 5 జిల్లాల పరిధిలోని 8 నియోజకవర్గాల్లో పోలింగ్ జరగనుంది. తృణమూల్‌ కాంగ్రెస్, భాజపా, కాంగ్రెస్, వామపక్షాల మధ్య ఇక్కడ పోటీ నెలకొంది.
పోలింగ్ సందర్భంగా ఎలాంటి అవాంఛనీయ సంఘటనలు చోటు చేసుకోకుండా 770 కంపెనీల కేంద్ర బలగాలను మోహరించారు. ఘటాల్‌ లోక్సభ స్థానంలో తృణమూల్‌ సిట్టింగ్‌ ఎంపీ నటుడు 'దీపక్‌ అధికారి'పై భాజపా తరఫున మాజీ ఐపీఎస్ అధికారిణి భారతీ ఘోష్‌ బరిలో ఉన్నారు. భాజపా రాష్ట్ర అధ్యక్షుడు దిలీప్‌ ఘోష్‌ మేధినిపుర్‌ స్థానం నుంచి పోటీ చేస్తున్నారు.
హరియాణాలో...
హరియాణాలోని 10 లోక్సభ నియోజకవర్గాల్లోనూ పోలింగ్ జరగనుంది. కాంగ్రెస్, భాజపా మధ్యే ఇక్కడ ప్రధాన పోటీ. కేంద్ర మంత్రులు క్రిషణ్‌ పాల్‌ గుర్జార్‌, రావ్‌ ఇంద్రజిత్‌ సింగ్‌, మాజీ ముఖ్యమంత్రి భూపీందర్‌ సింగ్‌ హుడా బరిలో ఉన్నారు.
బిహార్లో గెలుపెవరిది?
బిహార్‌లోని 8 నియోజకవర్గాల్లో ఆదివారం పోలింగ్ జరగనుంది. 2014లో ఈ 8 స్థానాల్లోనూ ఎన్డీఏ పక్షాలే గెలుపొందాయి. ఈసారి ఆర్జేడీ నుంచి తీవ్రమైన పోటీ నెలకొంది. పూర్వి చంపారన్‌ నుంచి కేంద్ర వ్యవసాయ శాఖ మంత్రి రాధామోహన్‌ సింగ్‌ పోటీ చేస్తున్నారు.
ఝార్ఖండ్ పోటీ...
ఝార్ఖండ్‌లోని 4 నియోజకవర్గాల్లో ఓటింగ్ జరగనుంది. ఝార్ఖండ్ మంత్రి చంద్ర ప్రకాశ్‌చౌదరి, మాజీ క్రికెటర్‌ కీర్తి అజాద్‌, మాజీ ముఖ్యమంత్రి మధుకోడా భార్య గీత ఈసారి ఎన్నికల బరిలో ఉన్నారు. కీర్తి అజాద్‌ కాంగ్రెస్ అభ్యర్థిగా ధన్‌బాగ్‌ నుంచి పోటీ చేస్తున్నారు.
ఇదీ చూడండి:
