భారత్లో పులుల సంఖ్య సంవత్సరానికి 6 శాతానికి పైగా వృద్ధి చెందుతోందని కేంద్ర పర్యావరణ శాఖ తెలిపింది. 2006 నుంచి ఇప్పటివరకు జరిగిన నాలుగు సర్వేల్లో ఈ విషయం స్పష్టమైనట్లు పేర్కొంది. గత కొన్నేళ్లలో జరిగిన సహజ నష్టాల నుంచి కోలుకొని పులుల సంఖ్య క్రమంగా పెరుగుతోందని తెలిపింది.
ఓ వార్తా సంస్థ దాఖలు చేసిన సమాచార హక్కు దరఖాస్తుకు స్పందనలో భాగంగా ఈ విషయాలు వెల్లడించింది పర్యావరణ శాఖ. దేశంలో గత 8 ఏళ్లలో 750 పులులు మరణించాయని మంత్రిత్వ శాఖ స్పష్టం తెలిపింది. సహజ మరణాలు, ప్రమాదాలు, వేట, ఘర్షణలు వంటి వివిధ కారణాల వల్ల ఇవి ప్రాణాలు కోల్పోయినట్లు స్పష్టం చేసింది.
"నేషనల్ టైగర్ కన్సర్వేషన్ అథారిటీ(ఎన్టీసీఏ)తో కలిసి భారత ప్రభుత్వం చేపట్టిన కార్యక్రమాల వల్ల పులుల సంఖ్య క్రమంగా కోలుకుంటోంది. నాలుగు సంవత్సరాలకు ఒకసారి నిర్వహించే సర్వేల్లో ఈ విషయం స్పష్టమైంది. వార్షికంగా 6శాతం మేర వృద్ధి రేటు నమోదవుతోంది. సహజ నష్టాల నుంచి కోలుకొని పులుల సంఖ్య పెరగడానికి ఇది దోహదపడుతుంది."
-పర్యావరణ మంత్రిత్వ శాఖ
పులుల వేటను నియంత్రించేందుకు 'ప్రాజెక్ట్ టైగర్' కింద అనేక చర్యలు చేపడుతున్నట్లు పర్యావరణ శాఖ వెల్లడించింది. దేశంలోని పులుల సంఖ్యను పారదర్శకంగా లెక్కించి గణాంకాలను ప్రజలకు అందుబాటులో ఉండేలా 'టైగర్నెట్.ఎన్ఐసీ.ఐఎన్' వెబ్సైట్లో పొందుపర్చుతున్నట్లు తెలిపింది.
