ఈ 'బడి దొంగ' నిజాయితీకి నెటిజన్ల ఫిదా!

బళ్లో దొంగతనం చేసి చర్యలు తీసుకోవద్దని పాఠశాల యాజమాన్యాన్ని వేడుకున్నాడో దొంగ. స్కూల్ బోర్డుపై తన గోడును చెప్పుకుని వైరల్​ అవుతున్నాడు. ప్రిన్సిపల్​ పోలీసులకు ఫిర్యాదు చేసిన విషయం తెలుసుకుని మరో సారి స్కూళ్లోకి చొరబడి ఫిర్యాదు వెనక్కి తీసుకొమ్మని క్లాస్​రూం బోర్డుపై రాసాడు. పోలీసులు దర్యాప్తు చేస్తున్నారు.

మహారాష్ట్ర పుణే జిల్లా ఆంబెగావ్​ మండల పరిధిలోని చాందోళి బుద్రుక్​ గ్రామంలో ఓ నిజాయితీ గల దొంగ కలకలం సృష్టించాడు. గ్రామంలోని జిల్లా పరిషత్​ పాఠశాలలో ఒకే వారంలో రెండుసార్లు చోరీలకు పాల్పడి చర్యలు తీసుకోవద్దంటూ బోర్డుపై రాసి వెళ్లాడు.ఆ దొంగ 32 అంగుళాల రెండు టీవీలను దొంగిలించుకెళ్లాడు. ఒక్కో టీవీ సుమారు 45 వేల రూపాయలు వెల ఉంటుంది. అందులో పిల్లలకు పాఠాలు చెప్పే ఓ సాఫ్ట్​వేర్​ సైతం ఉంది.

దొంగ వేషాలకు లభించని కనికరం

మొదటిసారి దొంగతనం జరిగిపోయింది. పాఠశాల ప్రిన్సిపల్​ దీపాలీ జలిందర్​ అజబ్​ కేసు పెట్టడానికి సిద్ధమయ్యారు. బోర్డుపై వింతగా ఏదో రాసుందని చెప్తే వెళ్లి చూసి ఖంగుతిన్నారు.

"నేను స్కూల్​ వస్తువులు దొంగిలించాలని అనుకోలేదు. నా కుటుంబ పరిస్థితులే నాతో ఈ పని చేయించాయి. దయచేసి పోలీసులకు నాపై ఫిర్యాదు చేయొద్దు. నా దగ్గర డబ్బులున్నప్పుడు నేను మీకు డబ్బు తిరిగిస్తాను" అంటూ బడిలోని బోర్డు మీద రాసి వెళ్లాడు.

దొంగ అంతలా బతిమాలినా కనికరించలేదు ప్రిన్సిపల్​. వెళ్లి పోలీస్​ స్టేషన్​లో ఫిర్యాదు చేశారు.

ఒక్కసారికీ వదిలేయండి ప్లీజ్​

పోలీస్​ స్టేషన్​లో ఫిర్యాదు చేశారని తెలుసుకున్న దొంగ.. మరో సారి స్కూళ్లోకి దూరాడు. "దయచేసి కంప్లైంట్​ను వెనక్కి తీసుకోండి." అని మరో సారి బోర్డుపై రాసి వేడుకున్నాడు.

ఈ బడిలో దొంగను తొందరగా పట్టుకుని మర్యాదలు చేసేందుకు పోలీసులు ముమ్మరంగా గాలిస్తున్నారు.

ఇదీ చూడండి:కశ్మీర్​లోని ఆడవారిని పెళ్లి చేసుకోండి: భాజపా ఎమ్మెల్యే