కరోనా మహమ్మారితో కుదేలైన ఆర్థిక వ్యవస్థను గాడినపెట్టేందుకు కేంద్ర ప్రభుత్వం లాక్డౌన్ ఆంక్షలకు సడలింపులు ఇచ్చింది. అన్ని రాష్ట్రాలతో సంప్రదింపులు చేసి అన్లాక్ 1.0ను సోమవారం (జూన్ 8) నుంచి అమలు చేయనున్నట్లు జూన్ 30న వెల్లడించింది. అన్లాక్ 1.0లో భాగంగా ఆతిథ్య, పర్యటక రంగానికి అనుమతులు ఇచ్చింది. ఈ నేపథ్యంలో సోమవారం నుంచి దేశవ్యాప్తంగా హోటళ్లు, రెస్టారెంట్లు, ప్రార్థనా మందిరాలు, ప్రసిద్ధ ఆలయాలు, షాపింగ్ మాల్స్ తెరుచుకోనున్నాయి.
పుదుచ్చెరి, కేరళ, గోవా సహా పలు ఈశాన్య రాష్ట్రాల ఆర్థిక వ్యవస్థలు పర్యటకం, ఆతిథ్య రంగంపైనే ఎక్కువగా ఆధారపడి ఉన్నాయి. రెస్టారెంట్లు, బీచ్లు, హోటళ్లను ప్రారంభించాలని ఆయా రాష్ట్రాలు కొద్ది రోజులుగా కేంద్రంపై ఒత్తిడి తెస్తున్న క్రమంలో పలు మార్గదర్శకాలతో అనుమతులు ఇచ్చింది. అయితే.. కరోనా విజృంభణ అధికంగా ఉన్న కంటైయిన్మెంట్ జోన్లలో ఉన్న హోటళ్లు, రెస్టారెంట్లు, ప్రార్థనా మందిరాలు మూసి ఉంచాలని స్పష్టం చేసింది.
3 వేలకుపైగా చారిత్రక కట్టడాలు..
దేశవ్యాప్తంగా వివిధ ప్రాంతాల్లో పురావస్తు శాఖకు సంబంధించిన 3,691 స్మారక కట్టడాలను పర్యటకుల సందర్శన కోసం జూన్ 8 నుంచి తెరిచేందుకు అనుమతులు జారీ చేసింది సాంస్కృతిక శాఖ. కేంద్ర ఆరోగ్య శాఖ విడుదల చేసిన మార్గదర్శకాలను తప్పనిసరిగా అనుసరించాలని సంబంధిత అధికారులకు సూచించారు కేంద్ర మంత్రి ప్రహ్లాద్ పటేల్.
దిల్లీలో హోటళ్లకు బ్రేక్..
కేంద్ర ప్రభుత్వం అన్లాక్ 1.0కు అనుమతులు ఇచ్చిన నేపథ్యంలో దిల్లీలో సోమవారం నుంచి మాల్స్, రెస్టారెంట్లు, మతపరమైన ప్రదేశాలు తిరిగి తెరుచుకోనున్నాయి. అయితే.. కరోనా విజృంభణ కొనసాగుతున్నందున హోటళ్లు, సమావేశ మందిరాలను(బ్యాంకెట్ హాల్స్)ను కొంతకాలం మూసే ఉంచుతామని ప్రకటించారు ముఖ్యమంత్రి అరవింద్ కేజ్రీవాల్. అవసరమైతే వాటిని కరోనా రోగుల చికిత్స కోసం వినియోగిస్తామని తెలిపారు.
దేశ రాజధానిలో సోమవారం నుంచి షాపింగ్ మాల్స్ తెరుచుకోనున్నాయి. దిల్లీ ప్రభుత్వానికి సుమారు రూ. 500 కోట్లకుపైగా ఆదాయాన్ని చేకూర్చే ఈ 100కు పైగా చిన్నాపెద్ద షాపింగ్ మాల్స్ తెరిచేందుకు కేజ్రీ ప్రభుత్వం అనుమతులు ఇచ్చింది.
ఆలస్యంగా పలు ప్రసిద్ధ ఆలయాలు..
సోమవారం నుంచే దేశంలోని పలు ఆలయాలు తెరుచుకుంటున్నప్పటికీ.. కేరళలోని శబరిమల అయ్యప్ప, అనంత పద్మనాభస్వామి, గురువాయూర్ శ్రీకృష్ణ ఆలయాలు కాస్త ఆలస్యంగా తెరుచుకోనున్నాయి. పద్మనాభస్వామి ఆలయం జూన్ 9న, శబరిమల ఆలయం జూన్ 14న, గురవాయూర్ ఆలయం 15న తెరుచుకుంటాయి.
ఇదీ చూడండి: హోటళ్లు కళకళలాడాలంటే కొంతకాలం ఆగాల్సిందే!
