1972లో 'సిమ్లా ఒప్పందం' కుదిరింది. జులై 2తో ఈ ఒప్పందానికి 47 ఏళ్లు. అయితే ఈ ఒప్పందంలో పాక్ డిమాండ్లకు భారత్ తలొగ్గిందని ఇప్పటికీ విమర్శలు వినిపిస్తాయి. డిమాండ్ చేసే స్థానంలో ఉన్న భారత్ ఎందుకు పాక్కు లొంగాల్సి వచ్చింది? ఈ ఒప్పందంలో జరిగిన రహస్యాలు ఏంటి? ఆ సమయంలో ప్రధాని ఇందిరాగాంధీ సలహాదారుల్లో ఒకరిగా ఉన్న నట్వర్ సింగ్ ఈ విషయాలపై ఈటీవీ భారత్ ముఖాముఖిలో కీలక వ్యాఖ్యలు చేశారు.
1971లో భారత్-పాక్ మధ్య యుద్ధం జరిగింది. ఈ యుద్ధంలో పాకిస్థాన్ సైన్యాన్ని భారత్ సమర్థంగా ఎదుర్కొంది. పాక్ సేనలు నలువైపులా చుట్టుముట్టినా... భారత్ సైన్యం ధాటికి దాయాదులు వెనుదిరగక తప్పలేదు. ఆ యుద్ధంలో 93,000 మంది పాక్ సైనికులను భారత్ బంధించింది. పశ్చిమ పాకిస్థాన్ భూభాగంలోని దాదాపు 5000 చదరపు మైళ్ల స్థలాన్ని భారత సైన్యం ఆక్రమించింది.
1972లో అప్పటి భారత్, పాక్ ప్రధానులు ఇందిరాగాంధీ, అలీ భుట్టో సిమ్లాలో భేటీ అయ్యారు. ఇరుదేశాల మధ్య శాంతి స్థాపనకోసం భారత్, పాక్ ఓ ఒప్పందానికి వచ్చాయి. ఈ ఒప్పందంలో భాగంగా భారత్ తాను ఆక్రమించిన పాక్ భూభాగాన్ని సహృద్భావ చర్యగా వారికి అప్పగించింది. మన చేతిలో బందీలుగా ఉన్న 93,000 మంది పాక్ సైనికులను విడిచిపెట్టింది.
దాయాదుల డిమాండ్లకు ఇందిరా గాంధీ ఇంతగా ఎందుకు లొంగాల్సి వచ్చిందనే సందేహంపై, ఒప్పందంపై నట్వర్ సింగ్ కీలక వ్యాఖ్యలు చేశారు. అప్పటి కేంద్రమంత్రులు, హోంమంత్రి ఇందిరాగాంధీకి పలు సలహాలు ఇచ్చినప్పటికీ ఆమె తనకు ఇష్టమైన సలహాదారు అక్సర్ చెప్పిన మాటే విన్నారని నట్వర్ తెలిపారు.
"భుట్టో, ఇందిరా గాంధీ సిమ్లాలో భేటీ అయ్యారు. చాలా సార్లు ఇరువురు ఏకాభిప్రాయానికి రాలేదు. అయితే చివరి భేటీ సఫలమైంది. ఒప్పందం కుదిరింది. చారిత్రక కోణంలో ఈ ఒప్పందాన్ని గమనిస్తే... మనం పాక్కు చాలా ఇచ్చేశాం. 5,600 చ.మై భూభాగాన్ని ఇచ్చేశాం. మనం బంధించిన 93,000 మంది పాక్ సైన్యాన్ని విడుదల చేశాం. భుట్టో మమ్మల్ని మాయ చేశారు. ఇప్పుడు ఇక్కడ నుంచి ఖాళీ చేతులతో వెళ్తే నా ప్రభుత్వం పడిపోతుంది అని భుట్టో అన్నారు. ఆయన చాలా తెలివైన వ్యక్తి."
- నట్వర్ సింగ్, కేంద్ర మాజీ మంత్రి
- ఇదీ చూడండి: పేదల కోటా వ్యతిరేక వ్యాజ్యాలపై విచారణ వాయిదా
